ORANJESTAD (AAN) – Den entrevista cu DIARIO, Sue-Ann Ras, Coordinador Nacional di Implementacion Nacional di e Ley di Kinderopvang y e Codigo di Proteccion “Meldcode”,
a splica cu den cuadro di e Social Crisis Plan e implementacion di e Ley di Kinderopvang, cu pa mas cu 30 aña nan ta bringando pa wordo implementa y ehecuta, ta otro paso solido pa por yega enberdad, na loke ta trata calidad di cuido pa nos muchanan, den e centronan di cuido.
Ras a señala cu nan ta trahando hopi duro riba e implementacion di e ley aki, poniendo tur e pre-condicionnan na su lugar. “Entre otro nos ta trahando riba e Decretonan Nacional y cu nos ta wardando aworaki riba e feedback di DWJZ (Departamento Huridico y Legislacion), pa por cuminza cu e rondanan di consulta cu tur e departamentonan di cuido pa nan por sa kico e Decreto Nacional ta encera, y pa wak tambe pa nos haya feedback di nan; kico nan ta wak cu ta realizable y kico no, y con nos por yega conhuntamente na implementacion di Ley di Centro di Cuido”, Ras a señala.
Pa loke ta trata intervencion trempan Sue-Ann Ras a bisa cu nan a sinti den e prome encuentro nacional, un deficiencia y un grito pa loke ta trata e centronan di cuido, pa nan por haya ayudo, den e parti di duna intervencion trempan pa nan por yuda e muchanan aki.
El a agrega cu di tur investigacionnan y rapportnan cientifico ta papia cu entre mas trempan detecta un deficiencia cerca un mucha, cu kizas pa hopi hende ta un inhabilidad y pa e muchanan aki ta un habilidad, mas trempan descubri esaki mas trempan nan por wordo yuda. Mas trempan tambe por laga nan desaroya nan potencial y habilidadnan.
Esaki ta e parti di mas importante den esaki y di biaha por papia di un sistema di inclusion estrategico y mas coordina tambe, pasobra e ora ey por wak e muchanan aki for di trempan y realmente por forma parti y ta inclusivo den nos comunidad.
Ras a menciona cu den e aspecto aki DMH ta colaborando cu Universidad di Missouri, cu ta esnan cu ta ekipa profesionalmente y ta bay yuda Aruba con por bay crea su propio sistema, un plan di accion, pa yega na intervencion trempan den centronan di cuido pero tambe riba un aspecto nacional.
Ras a agrega cu e bunita di tur esaki ta, cu nan trahando hunto cu tur e stakeholders concerni. Pues, profesionalnan di Aruba cu ta sumamente ekipa, cu tin un perspectiva amplio, y nan sa kico tur ta nan barera y limitacionnan. Nan ta pone tur esaki den practica pa wak, con por crea a base di tur esaki, algo unda ta keda un “action learning” na unda cu “bo ta siña segun cu bo ta cana”. No kiermen cu nan ta bay traha un plan of programa cu ta bay ta sin eror. Ora ta trata di proceso, cerca mucha y hopi biaha tambe cerca hende grandi, e ta tuma su tempo.
Sue-Ann Ras a finaliza bisando cu e ta hopi contento con e siman aki ta bay, e ta hopi positivo y e profesionalnan di veld ta hopi activo durante e dia, y nan ta brainstorm con pa yega na e meta.
