Jair Britten di Pro-Cunukeronan Arubano:
ORANJESTAD (AAN) Señor Jair Britten, Presidente di e organizacion Pro-Cunukeronan Arubano a referi na un pregunta cu el a haya tocante fondonan cu a yega di a drenta Aruba y Qredits a probecha di nan pa fia hende, y kizas a cobra interes riba esaki.
Jair Britten a bisa al respecto: “Mi ta haya cu esaki ta algo cu ‘so & so’ ta cuestionable, y ora tin yen firmamento den cinco aña mes, -bo a tuma e proyecto ey? Kico ta sostenible?
“Si den cinco aña bo a bin na e fondonan ey y e proyecto tabata sostenible manera e ta representa den palabra, aworaki na 2026, riba mercado local kico e produccion mester ta, kico a representa? Kico e prijsnan? Nos a mira esey? E ta factible”, ta preguntanan cu Jair Britten ta laga habri.
Tocante e hecho cu e otro islanan ta cla pa cuminza cu desaroyonan riba tereno di agricultura, cria y pesca, Jair Britten a bisa cu esaki ta varia, ya cu e ta siguiendo tur e desaroyonan aki y esaki ta un aspecto positivo atrobe, di DCALPHA, pasobra nan ta zorg pa un union y comunicacion mas fuerte, directo.
“Nos ta purba evita tur e tercer personanan, y mediadornan cu ta haciendo daño”, el a subraya.
Britten a pone como ehemplo un caso na Curacao di un criador di bestia, cu a gara hende ta horta riba su tereno y e mester a uza defensa propio. “Nos no ta pro violencia pero bo tin cu defende bo mes riba bo tereno. E meneer aki a wordo cera y e criadornan a uni, bay protesta y e persona a sali liber y nan a compronde cu su caso tabata den defensa propio.
Mescos cu nos ta mira desaroyonan di compra di terenonan pa innovation parks, di agricultura. El a señala cu cada pais den nan maneho ta bezig cu cosnan asina. Na Isla Ariba tin e hendenan cu ta coi calco y shrimp. Aki na Aruba bo ta wordo criminaliza si bo ta haci esaki. Tiramento di pisca, cu ta parti di nos cultura, y identidad di hende di Isla. Bo por bisa mi cu mi ta rondona di lama anto mi no por tira pisca?” Jair Britten ta cuestiona.
“Aki na Aruba nos mester pone hopi hende bin bij di e ‘Consumer Mentality’ cu ta cabando cu nos. Bo kier comercializa e Isla aki, na un manera cu no ta viable mas pa nos, economicamente, pasobra e ta mara nos na importacion” Jair Britten, di Pro Cunukeronan Arubano, a conclui.
