Hefe di WHO: ORANJESTAD (AAN)- Mientras ainda tin hopi hende aki na Aruba, y den exterior, cu ta insisti cu omicron ta djis un tipo di griep, y hasta a stop di sigui e protocolonan
pa nan haya e virus, cu e idea cu asina e lo eradica na un forma natural, e hefe di Organizacion Mundial di Salud (WHO), Tedros Adhanom Ghebreyesus, a caba di declara cu no mester clasifica e variante Omicron como leve, pasobra “e ta matando hende”!
El a duna di conoce cu e cantidad halto di casonan causa door di omicron, cu ta mas contagioso cu Delta, ta causando hopi presion den e hospitalnan y a agrega: “Aunke Omicron ta parce menos grave den comparacion cu Delta, specialmente pa personanan cu a vacuna, no ta nifica cu mester wordo clasifica como ‘leve’, pasobra mescos cu e variantenan prome cune, e ta causa hospitalizacionnan, y ta matando hende!”
El a subraya cu e aumento exponencial di e contagionan ta pasando over e capacidad di e sistemanan sanitario na henter mundo.
Siman pasa a wordo notifica na WHO 9.5 miyon di contagionan nobo di covid-19 locual ta un record, y esaki ta nifica cu e cifra a aumenta den 71% en comparacion cu e siman anterior, y WHO ta señala cu probablemente, e cifra ta mas halto.
