Na vispera di eleccion na Venezuela DIARIO ta bolbe den historia
*Aruba mester a bira centro di operacion di grupo Nicolas Maduro
*E frontera cu awe ta cera mester a bira brug den “awanan teritorial”
ORANJESTAD (AAN) — Un decada a transcuri for di e momento cu Aruba a confronta uno di e peligronan mas grandi den su historia.
Putin sin duda ta ratifica e realidad di comunismo, cu no conoce balor di hende y ta uza hende solamente pa un grupito cu no por traha pa nan placa, pa medio di dictadura, horta oficialmente ta di e Pueblo y di e pais pa asina nan tin poder.
Chavez ta un comunista, cu a bira sigur peligroso na un pais manera Venezuela cu e poder economico di petroleo, cu tambe ta motibo di confrontacion mundial te awe.
Nacionalisacion di economia di Venezuela a kita placa for di Pueblo pa entrega na Gobierno di Chavez, cu asina por a asumi un puesto poderoso den e conkista comunista mundial, cu Gobierno di Rusia probechando di loke ta wordo kita for di boca di hende, cu ni pa papia por habri boca te pa asina dicidi con ta pone cuminda den boca.
Na Maart 2013, morto di Chavez a haci Nicolas Maduro Presidente di Venezuela, cu ya na 2014 a cuminsa lanta contra e avance di hamber y miseria na e pais.
Pa keda na poder, Maduro a deshaci di Constitucion di e pais, cu el a duna otro contenido, loke a causa protestanan grandi cerca Pueblo cu a cuminsa subi caya.
Maduro a silencia poder di Asamblea General den e temponan cu el a presenta na Aruba, como e gran salbador financiero y economico di Aruba pa medio di e refineria Citgo.
Gobierno Mike Eman, a firma acuerdo pa entrega economia di Aruba na Nicolas Maduro, na un momento cu Hulanda tabata adverti Mike Eman cu e no por a sigui gasta placa di Pueblo di Aruba.
Nicolas Maduro a bira e gran salbador di economia di Aruba, na momento cu mundo a cuminsa cera porta pa Maduro, cu a mira su cabezante di Citgo na Merca, na careda pa bandona Citgo.
Ta den e tempo aki Citgo mester a comberti Aruba den asilo pa Grupo Maduro, cu no por a keda Merca cu a tuma medida contra regimen di Maduro.
Democracia a muri na Venezuela, cu tin como forsa su poznan di petroleo, cu sigur den e crisis di Covid-19 y e crisis di petroleo cu a surgi a base di accion di clima, a conoce un Pueblo di sufrimento grandi.
No tin libertad di expresion na Venezuela cu ta completamente domina pa e poder militar di Nicolas Maduro cu ta duna tur prueba, cu e lo entrega su poder politico, cu ta unico logro den su bida.
Pero kico poder economico por haci y sigur poder di petroleo, a keda demostra den e actitud di mundo enfrente Nicolas Maduro.
Originalmente ningun pais democratico a acepta Nicolas Maduro como Presidente y hasta mundo a conoce e situacion di dos presidente na Venezuela, despues cu e dirigente di Asamblea General, Juan Guaido a wordo acepta y hasta a huramenta como Presidente di Venezuela cu sosten di mundo, cu a duna prueba cu e no ta completamente liber ora e mester tuma decisionnan dificil.
Ora mundo a mira cu e no por a kita e poder di petroleo di Nicolas Maduro, cu den transcurso di tempo tur hende a cuminsa considera Presidente di Venezuela pasobra el a logra cu forsa bruto keda den e puesto discuti, Nicolas Maduro a keda Presidente di Venezuela y Juan Guaido a bira un nomber lubida.
Diadomingo Venezuela ta bay urna electoral. Venezuela mester dicidi si e kier mantene na poder, Nicolas Maduro, cu na 2016 a firma un documento cu Gobierno Mike Eman cu a haci su persona practicamente doño di economia di Aruba.
Cielo tabata cu Aruba ora Juan Guaido a bira Presidente Interino y na Merca a bira posibel pa Prome Ministro Evelyn Wever-Croes logra pa Aruba scapa di su acuerdo cu Nicolas Maduro.
Kico lo pasa na Venezuela? E cantidad di hende cu ta pone nan bida na riesgo pa scapa nan bida, no ta motibo pa aplauso di e homber cu Gobierno Mike Eman kier a converti den e homber pa consolida balanza di pago di Aruba na 2016!
Pa Aruba ta sigur importante pa sigui vigila Venezuela y tene frontera cera cu teritorio domina pa Nicolas Maduro, cu na Guyana ta duna prueba di e peliger grandi cu ta sconde den e amenaza di Nicolas Maduro, cu Aruba ta situa den awanan teritorial di Venezuela.
