PHILIPSBURG: E regla cu tur negoshi na St. Maarten tin di cera pa 11:00 pm, a wordo extendi. Esey ta loke Gobierno di e isla a informa e siman aki.
Keto bay e cantidad di casonan activo di Covid-19 riba e isla ta demasiado halto. Gobierno no a divulga pa cuanto tempo mas e medida di horario di cierre lo keda na vigor.
St. Maarten sa cu High-Season di Turismo ta yegando, pero toch e isla tin di haci algo pa sigura cu tur hende ta keda safe, y haci lo corecto. E isla ta spera di por haya un empuhe economico cu turismo di High Season.
Gobierno di e isla a haci tur cos pa yuda controla e cantidad di casonan di Covid-19, pero esaki no por wordo haci sin e cooperacion di pueblo.
Mientras tanto, un di e popular club nocturno na e isla, esta ‘We Lounge’ na Maho Village a wordo gara ta habri despues di 11:00 pm. Door di esey e negoshi a haya un boet masha grandi mes, y Gobierno a duna ordo pa e keda cera pa 1 siman largo.
Ta banda di 1:50 am riba Diadomingo madruga ora cu un pelea a start na e Lounge, cu porfin Polis a bin haya sa cu ainda e negoshi ta habri mas casi 3 ora despues di e horario di cierre. Un turista a haya botter den cabez y pesey Polis a ser yama.
A bin haya sa, cu We Lounge a comete varios violacion den pasado, y a ricibi advertencia. Pero awor si nan a cruza e linea y a wordo ordena pa cera pa 7 anochi largo.
