ORANJESTAD (AAN): Recientemente Nayeli Besaril a defende su tesis exitosamente y a obtene e titulo di ‘Bachelor of Arts’
for di e programa Organization, Governance and Management (OGM), Facultad di Arte y Ciencia.
Nayeli Besaril a defende su tesis “Agile vs Traditional Project Management Approaches; Measuring the impact of Job Satisfaction” dilanti di e comision di graduacion cu tabata consisti di Niels Wiskerke, MA, Drs. Jacques van der Scheer y Marilinda Croes, Msc. Ademas tabata presente manager di e programa OGM, Ahmet Talan, MSc, famia, docente di Universidad di Aruba y colega di estudio.
Nayeli Besaril a haci un investigacion tocante e impacto di metodologianan di ‘project management’ riba satisfaccion laboral di empleadonan na Aruba. A compara e dos metodologianan principal di ‘‘project management’’ esta, ‘agile’ y ‘traditional’. E participantenan di e estudio a comparti nan experiencia tocante carga di trabao, trabao den ekipo y e balansa entre bida personal y profesional. E resultado a mustra cu ‘’agile’’ ta stimula mas colaboracion y flexibilidad, mientras cu metodonan tradicional ta ofrece mas stabilidad y structura.
A base di e resultado, e investigacion a propone diferente recomendacion. Un di e recomendacionnan ta pa e organizacion scohe un metodo cu ta cuadra cu nan proyecto pa asina aumenta compromiso y motivacion di e empleadonan. Otro recomendacion ta pa duna empleado mas flexibilidad pa un miho balansa entre bida personal y profesional. Tanto ’agile’ como ’traditional’ por beneficia di implementa mas flexibilidad, specialmente durante periodo di stress.
Ta gradici e docentenan di e departamento di OGM y profesional cu a yuda guia Nayeli Besaril como studiante. Tambe ta gradici tur esnan na, y pafo di Universidad di Aruba cu a contribui na un manera of otro na e acontecimento aki.
Pa lesa e resumen of e tesis di e studiante, por fabor bishita e pagina di publicacion di Universidad di Aruba via e website:
Pa mas informacion tocante e estudio OGM, bishita e website di Universidad di Aruba na www.ua.aw/ogm
DIARIO ta manda felicita Nayeli Besaril cu su graduacion.
