Hopi programa pa detenido ta andando den KIA:
ORANJESTAD (AAN) – Minister di Husticia Rocco Tjon a sigui elabora, den conferencia di prensa Dialuna, tocante e proyectonan cu tin pa desaroya den KIA. El a bisa cu tambe, hopi biaha, e pregunta di prensa cu ta bin padilanti ta: “Kico ta wordo haci pa e detenidonan, pa enberdad logra pa nan reintegra y socializa bek?”
E mandatario a splica cu tin hopi programa andando aworaki, y hopi di nan ta toca deporte, obra di man, y tambe na fin di Maart ta bay lanza un proyecto nobo na unda lo introduci den un afdeling, un “smart class room” pa brinda tur e detenidonan hoben e oportunidad di haya les, atravez di un E-Learning Plataforma.
Ademas di esaki, na Maart tambe lo bay cera un convenio cu Fundacion Enseñanza pa Aruba, pa di e forma aki por garantiza cu structuralmente tin cursonan ta wordo brinda na tur e detenidonan.
Kiermen, cu no ta depende mas di un docente specifico; obviamente e docentenan cu ta traha na KIA ta keda haci nan trabao pero si cera un convenio di e forma aki, lo por garantiza mas curso y mas tayer di trabao pa e detenidonan.
Ta hopi importante, e minister a subraya, cu esaki ta wordo ofreci a base di analisis cu ta wordo haci den KIA mes, door di e trahadornan, pa wak kico tin na interes di e detenidonan, kico ta nan capacidad, pa asina sa tambe cu locual cu ta bay wordo ofreci, nan lo bay participa na dje y obviamente, nan lo ta exitoso.
Otro aspecto hopi importante, ora ta traha institutonan coreccional, minister Tjon a añadi, ta si por haci posible cu un detenido por traha.
“Den KIA tin diferente trabaonan cu detenidonan lo por haci, y como Instituto Coreccional mester por haci esaki posible tambe”, e dignatario a bisa.
Minister Tjon a informa cu aworaki tin 141 detenido cu tin un trabao den KIA, y di e forma aki tambe e ta parti di henter e proceso pa percura cu nan por integra y resocializa, na un manera exitoso.
REORGANIZACION:
Minister Tjon a toca e tema di e Instituto su proceso di reorganizacion, cual ta un parti hopi importante tambe. E mandatario a bisa cu e reorganizacion di KIA ta den su fase final. E “ plaatsing procedure” ta tras di lomba y henter e personal a haya oportunidad nan keho si nan tabata tin esey, a base di e plaatsing procedure.
Aworaki e ultimo analisis ta wordo haci, pa loke ta tur e diferente kehonan cu a wordo entrega door di e comision independiente cu ta haci esaki, y un bez cu esaki ta cla, sigur prome cu fin di luna, lo acerca sindicatonan tambe pa por bay “rond af” henter e proceso di reorganizacion tambe.
