For di fuentenan den ELMAR mes nos a haya informacion cu no ta tur trahado ta apoya loke a keda publica recientemente di e director di e compania.
Tin trahadornan cu a manda informa nan banda di medaya bisando; “ loke ta pasando den Elmar ta, cu tin un grupo di empleado cu no kier pa cierto informacion di nan berdadnan sali na claridad, nan no kier pa e fiesta caba.
Pero nan ta lubida cu no ta tur empleado ta sali cu nan, ni tampoco ta goza di e privilegionan cu nan a crea pa nan mes. Promer cu e director nobo di NV Elmar a tuma su encargo, ya caba Sr. Raymond Maduro a cuminsa boicotea e director nobo sin cu e la traha ni un dia. Sr. Maduro ta bon conoci na Elmar, como un ex-empleado cu nunca a funciona, un empleado cu semper a trece desunion den Elmar y tabata gusta susha nomber di coleganan.
Hopi di nos sa cu despues cu e tabata president di UEA, nan a regala Sr. Maduro un promocion pa e baha como presidente di UEA pa e stop di stroba procesonan den Elmar, cu otro palabra el a wordo cumpra cu un promocion, anto awe e kier bin papia di “Governance code”.
Door sr. Maduro no tabata funciona y tabatin hopi indicacion cu tabata tin cosnan straño y contra regla ta tuma lugar pa loke ta keuring, a dicidi pa no tene e mas na trabao. Pa colmo, por a compronde for di un relato di Utilities Aruba cu nan no kier perde tempo cu Alvast tampoco, pa motibo cu ta solamente 17 miembro nan ta representa y ta keha ariba cosnan cu no tin sentido.
Mester bisa e cos manera cu e ta, den Elmar tin hopi appel putri, aki den tin hopi hende kier hunga hefe, kier cobra capitalaso di placa na salario pero nan no ta produci. Tin algun cu no tin e educacion adecuado pa ta den nan posicion tampoco y nan no ta interesa pa upgrade nan mes.
Esnan cu tin contract nobo ta reclama cu tur derecho; “Nos tin cu traha mas duro y nunca nos por yega e salario astronomico cu algun hende aki den ta gana.” Dicon Maduro no ta reclama esaki. E pregunta pues ta; ta pasobra cu e director nobo aki kier hiba un maneho husto pa tur hende, Alvast kier boycotea esaki? Wel esaki ta djis e promer parti di loke nos kier saca for di paden di ELMAR.
Nos no ta contra e director nobo, pero nos no ta pro tampoco ainda, nos kier wak e homber traha prome. Si e traha bon y deal cu e Puyitonan cu tin cu sali, nos lo apoy’e, pero laga Irausquin traha trankil pa drecha Elmar, por fabor no bin stroba! Asina un grupo di trahadornan di ELMAR ta laga sa.
