ORANJESTAD (AAN): Peregrinonan e biaha aki lo no por ta presente na e Dia di Oracion cu lo tuma lugar na Genadekapel di Amsterdam.
Ta lastima cu pa motibo di e pandemia, e integrantenan di e comision di Hulanda cu ta bin tur aña no por bin Aruba.
Esaki ta un invitacion pa un dia di oracion na honor di e Señora di tur Pueblo cu lo tuma lugar diasabra awor dia 22 di Mei 2021, bispo di Pentecoste, via livestream.
Esaki lo worde transmiti for di Kapel di Amsterdam.
DIARIO a compronde cu e dia di oracion aki lo worde transmiti via e website di www.prayerday.info y lo worde traduci den 9 idioma: Aleman, Hulandes, Ingles, Spaño, Frances, Italiano, Polaco, Arabe y Slovaco.
For di Aruba bo por mire solamente via e website.
E lo cuminza pa 9:00 am ora di Hulanda, pues na Aruba e ta socede pa 3:00 am di madruga.
Pa 3:00 am lo cuminza cu Adoracion Eucaristico. Pa 4:00 am lo tin Conferencia di pastoor Paul Maria Sigl riba e tema: “Dios ta duna nos via di Maria, e Mama di tur Pueblo, consolacion, proteccion y speranza.
Pa 5:10 am tin un pausa.
Pa 7:30 am lo tin Adoracion Eucaristico. Pa 8:00 am lo sigui cu e di dos parti di e Conferencia. Pa 9:00 am lo tin Ora di Divino Misericordia.
Pa 10:00 am lo tin un Santa Misa, presenta pa Monseigneur Jan Hendriks, Obispo di Haarlem-Amsterdam. Lo worde concelebra pa Monseigneur Jozef Punt, obispo emerito.
Na final lo tin consagracion solemne na Inmaculada Curazon di Maria.
Pa mas informacion tocante e status actual di e debocion di e Señora di tur Pueblo, por click tambe riba e siguiente linknan (kies e idioma cu bo ta prefera):
