ORANJESTAD (AAN): Temporada di horcan a inicia 1 di juni y ta termina 30 di november, 2021.
Durante e temporada aki nos ta experiencia temperaturanan halto y biento ta cay, asina causando un calor mas intensivo cu otro dianan den aña.
Temporada di horcan ta trece temporada di calor, esaki por tin efecto riba consumo di coriente, particularmente airco di cas y negoshi. Mas e temperatura di pafo subi, mas energia bo airco lo bai consumi pa regula e temperatura cu tin indica riba e thermostaat.
E aumento di temperatura pafo tin influencia riba bo consumo y esaki por refleha den un aumento den bo cobransa di coriente pa e lunanan venidero.
Mas calor bira paden, mas duro bo airco mester traha pa regula temperatura. N.V. ELMAR ta recomenda pa mantene e thermostaat di e airco na un temperatura di 25 grado celsius durante dia. Cubri bentanan cu cortina of “blinds” pa asina blokea e rayo di solo, esaki por yuda reduci e efectonan di calor. E uso di un “ceiling fan” of un “fan” normal tambe lo por yuda alivia e consumo di energia di un sistema di airco.
N.V. ELMAR ta recomenda tur cliente pa sea consciente cu consumo di coriente durante temporada di calor. Pa mas informacion y tips di seguridad di coriente durante temporada di horcan sigui nos pagina di Facebook NVElmarAruba.
