Despues di vacacion un rumbo fiho pa Aruba mester bira visibel
*Inflacion actual ta basa riba un era economico marca pa Kleenex
*Mester educa e ser humano pa medio di algo mas cu taza di interes
ORANJESTAD (AAN) — Den analisis di un situacion semper tin dos palabra cu contenido diferente.
Pa comprende loke ta pasa actualmente riba tereno economico, financiero y social mester atende cu e origen di un cultura internacional, cu a deshaci di e cultura local ora ta gasta placa pa haya producto of servicio.
Mester profundisa den e motibo di e entrada di loke a cambia e cultura local riba cierto tereno.
Tradicionalmente na Aruba, gasta placa tabata wordo considera un responsabilidad importante. Tabata gasta placa a base di proyeccion di e entrada cu por a spera pa asina por a cubri e gastonan.
Na Siglo 20, e cultura di consumo a haci su entrada na mundo cu a deshaci di su balornan existente y introduci normanan nobo.
Esaki a haci cu cantidad di campesino cu tur nan conocemento di tur loke ta trata produccion agricola por ehempel, a dicidi cu nan kier bay traha den oficina.
Nan ta prueba di expertonan riba nan tereno cu a dicidi di laga un bon entrada atras pa un trabou cu un imagen social mas “atractivo”.
Siglo 20 ta wordo considera e Era di Consumo y a haya e nomber di “Era di Kleenex” pasobra hende a deshaci di loke ta duradero y por wordo uza na diferente forma y pa hopi tempo, pa Kleenex, cu ta uza un solo bez y depone den basura.
E Era di Consumo a habri porta pa e problemanan serio di clima cu mundo ta enfrenta, loke ta visibel den e cantidad di plastic indestructibel cu ta yena oceano.
Pero e ta visibel tambe den loke hende ta come, den loke hende ta bisti, con hende ta transporta su mes y edificionan entre otro.
E Era di Consumo mester a satisface e demanda publico y personal cu tabata produci placa, cu despues di Segundo Guera Mundial tabata presente na forma abundante na mundo.
Moda a cuminsa cambia continuamente y a introduci material menos duradero. Tur aña mundo a conoce modelonan nobo pa zapato y paña, muebles, color, cortina.
Hende tabata habri bentana pa drumi anochi. Awor hende tin airconditioning.
Consumo a cambia hende completamente y a afecta e exigencia di hende pero tambe e necesidad di hende.
Antes na tur cas practicamente por a topa cu mata di fruta, mata di lamunchi, pero tambe cria di galiña. Awe tur esaki a desaparece.
Casnan tabata wordo traha cu material cu por soporta sistemanan di tempo pero tambe tabata wordo traha cu material solido.
“Duradero” ta e palabra cu a desaparece den e desaroyo di e mundo di consumo, cu medionan di comunicacion ta ta presenta tur dia.
Pa por goza di e mundo di consumo, hopi hende a hinca nan mes den debe pisa. Pa nan infrastructura basico nan kier depende di gobierno cu tin e placa di belasting, y ta exigi cas, trabou cu ta paga suficiente y ta duna oportunidad pa bida luhoso.
Expertonan cu kende DIARIO a atende e diferente topiconan cu ta uni den e presentacion di awe, ta mustra cu e situacion social mundial actual no por wordo atende solamente cu mas salario, mas placa.
Mester cuminsa atende cu e mentalidad y e reforma di comunidad, cu mester wordo normalisa ya cu el bandona orbita di normal durante ultimo siglo.
Consumo ta dicidi pa hende cu ta cumpra y sigui cumpra. Ora no tin placa ta presta placa, cay den mas problema of manera ta mira mas y mas horta of bira corupto.
Mester di consumo. Mester di e sector comercial cu semper a existi pa sirbi e consumidor.
Na momento cu un compania ta wordo forsa pa tambe haci gasto pda upgrade su mes na e loke e mundo moderno ta exigi y atende cu marcanan cu sosten legal, gastonan di e compania ta exigi pa e subi prijs na un pais cu ya mester satisface e turista.
“Mester dal stap atras,” tur informante ta indica. Prijs ta subi. Trahadornan kier pa salario subi. Empresarionan kier pa nan ganashi subi. Gobierno mester percura pa e tin suficiente entrada.
Segun informantenan, mundo ta enfrenta e momento cu mester deshaci di e fantasma di mundo di consumo, cu a causa hopi debe na paisnan y hende.
Gobierno no por keda e instancia cu ta uza tur placa di Pueblo den e lucha contra consumo exagera.
E prioridad grandi despues di vacacion ta, pa baha gasto di tur forma. Baha gasto di electricidad na edificionan di Gobierno. Baha gasto di awa na fontein por ehempel.
Baha gasto di transportacion y representacion den Gobierno y departamentonan di Gobierno.
“E Era di Consumo no ta existi mas”, informantenan ta indica. Mester bolbe na normalidad cu ta nifica a base di e ingreso y gasto nacional y personal.
