Minister Geoffrey Wever:
ORANJESTAD (AAN): Minister Geoffrey Wever tabata presenta diabierna mainta durante e firmamento di un MoU (Memorandum of Understanding) entre Gobierno di Aruba y United Farmers Aruba (UFA). Ta trata di un acuerdo di cooperacion pa desaroyo di e sector primario.
E mandatario a remarca cu durante e pandemia di Covid-19 a keda den evidencia cu Aruba ta demasiado dependiente di e desaroyonan internacional. Pero e acuerdo aki, entre sector priva y sector publico ta e inicio pa desaroya un plataforma caminda cu tin cooperacion.
Ta necesario pa den e caso aki gobierno manda un señal pa loke ta e sector primario cu ta haciendo esaki caba den un base regular. Awor kier comparti informacion y conocimento cu sector publico tin y facilita unda cu mester yuda pa asina yega na un mihor desaroyo.
"Inverti den sector primario lo yuda nos hisa nos GDP. Menos importacion ta di importancia pa nos GDP y pa e desaroyo di nos economia. E por hiba nos na crea cuponan di trabao nobo. E por yuda nos pa reserva divisanan cu ta bay afo pa cumpra productonan alimentario. Mi ta kere esaki ta e manera pa nos por trece cambio den e situacion ey", Wever a expresa.
