ORANJESTAD (AAN)- Prome Minister Evelyn Wever - Croes durante reunion di Parlamento cu a tuma luga e siman aki riba e tema di acuerdo firma entre WEB y Eagle LNG,
a splica cu e mocion entrega pa Parlamentario Kamperveen ta uno sumamente importante y ta un mocion cu ta resumi tur locual a wordo discuti e dos dianan den Parlamento.
Premier Wever - Croes a splica cu primeramente e mocion ta pidi pa Minister encarga busca un manera pa haya e contract firma pa LNG, sinembargo Minister Glenbert Croes ainda no por a duna Parlamento e contract pero lo busca manera pa haci esaki.
“Como Prome Minister mi ta haya cu ta importante pa si kier algo como Parlamentario, no forsa e Minister pa kibra ley, enbes busca un manera pa haya e claridad y transparencia cu ta desea. Nos ta respeta cu Parlamento kier transparencia y nos kier pa Parlamento exigi transparencia tambe”
E di dos punto den e mocion ta trata ‘hydrogen’. E peticion ta pa acelera esaki y bin cu un proyecto piloto. Cual definitivamente por wordo haci segun Prome Minister.
Pa locual ta e di tres y di cuatro punto den e mocion, esakinan ta encera ‘corporate goverance structure’. Pa cual Premier Wever - Croes a splica cu e tambe a sinti den e dos dianan di reunion cu Parlamento tin deseo di tin mas control den companianan estatal, cual lamentablemente no ta asina aworaki.
E peticion ta pa haci un estudio y mira con por duna Parlamento mas ‘tools’ pa Parlamento por controla (considerando e hecho cu Gobierno ta un share holder) den un compania estatal, vooral ora ta trata inversionnan di termino largo.
Pa finalisa e reaccion di Premier Wever - Croes riba e mocion aki, a enfatisa cu ta di acuerdo cu locual a keda presenta y ta puntonan cu ta desea tambe.
