ORANJESTAD (AAN): Informacion for di Den Haag ta indica cu Minister di Husticia y Asuntonan Social Rocco Tjon a haci un bishita na Arubahuis.
Akinan e mandatario a keda ricibi pa Minister Plenipotenciario mr. Ady Thijsen.
Minister Tjon ta cu un bishita di trabao na Hulanda, unda el a reuni cu Secretario di Estado pa Asuntonan di Reino Alexandra van Huffelen. Tambe Minister Tjon a reuni cu Minister pa Proteccion di Derecho (Rechtsbescherming) Franc Weerwind.
Banda di e combersacionnan riba nivel politico, minister Tjon a reuni entre otro cu diferente instancianan den e cadena hudicial, asunto di prison y cu CBR cu ta e instancia na Hulanda cu ta otorga rijbewijs.
Minister Thijsen a bisa di ta contento cu e bishita di Minister Tjon y su delegacion na Arubahuis. Alavez e lo acompaña Minister Tjon na diferente reunionnan pa asina por canalisa e follow up cu lo mester sigui basa riba e palabracionnan haci durante di e bishitanan. E potret ta cortesia di Arubahuis.
