ORANJESTAD (AAN): Diamars mainta Minister Glenbert a reuni cu Sindicatonan hunto cu WEB Aruba NV, NV Elmar y Utilities Aruba NV riba e ahuste recien di prijs di awa y coriente.
Manera tur por corda, 30 di juni ultimo WEB a anuncia aumento di tarifa di awa, cual ahuste a keda introduci 1 di juli ultimo. E anuncio aki no a worde acepta pa Gobierno di Aruba a pospone e introduccion aki. Unico motibo di esaki tabata pa yega na un tarifa mas socialisa cu un reparticion husto.
Conhuntamente cu Minister di Economia, Geoffrey Wever, a yega na un structura nobo di tarifa pa WEB y pa ELMAR cual a worde aproba pa Conseho di Ministronan. E reparticion aproba tabata social, pa esunnan di menos recurso worde menos afecta pa e ahuste aki. Na mes momento Gobierno a dicidi cu e prijsnan nobo lo worde reevalua dentro di 6 luna atrobe.
Sindicatonan a expresa nan preocupacion. Den e reunion encabesa pa Minister Glenbert Croes a sinta cu sindicatonan hunto cu director di WEB Aruba NV, NV Elmar y Utilities. E mandatario a considera e reunion hopi constructivo, fructifero y franco. E discusionnan tabata hopi abierto y franco. Di parti di Sindicatonan a haci un apelacion na WEB pa reevalua e structura nobo di tarifa pa hacie mas social ainda. E mandatario a apoya e peticion aki. WEB di su banda tambe tabata habri pa bay haci e ehercicio interno pa reevalua un structura aun mas social unda cu esunnan di menos recurso ta worde menos afecta y mas beneficia.
Manera Minister Glenbert Croes a expresa, ningun Gobierno kier aumenta ni awa ni coriente ni gasolin. Pero e guera di Rusia/Ucraina a gara mundo di sorpresa cu a ocasiona un aumento drastico na nivel mundial di prijs di petroleo. Y apesar cu desde januari ultimo WEB y ELMAR tabata pidi pa aumenta e tarifanan, e mandatario no a permiti esaki, pasobra mescos cu e pandemia a afecta e companianan aki, el a afecta nos pueblo severamente.
Apenas Aruba a drenta aña di recuperacion pa cual e mandatario kier a brinda pueblo e espacio pa recupera y para back riba pia. Pero ora cu na luna di februari e guera entre Rusia y Ukrania a cuminsa, esaki a afecta solvencia di nos companianan estatal barbaramente.
Asina mes e mandatario a keda pospone e aumento. Pero ta yega un momento cu como Gobernante bo mester ta responsabel den bo maneho cual ta conta pa nos pueblo primordialmente, pero tambe pa existencia di nos companianan estatal.
Minister Glenbert Croes ta expresa su gratitud na tanto Sindicatonan como tambe Gerencia di WEB, ELMAR y Utilities pa un reunion fructifero cu e miho intencion di tur envolvi pa e bienestar di nos pueblo.
{gallery}Ministro Glenbert Croes hunto cu Sindicato y tambe WEB, ELMAR y Utilities a sinta na mesa cu otro{/gallery}
