ORANJESTAD (AAN): Recientemente Ministerio di Innovacion a reuni cu diferente departamento y institucionnan den cuadro di aceleracion pa implementacion di e proyecto di e-Government.
Pa reforsa e colaboracion y acelera e proceso di implementacion, Ministerio di Innovacion a establece un grupo directivo, Stuurgroep Digitalisatie, Innovatie en Automatisering, pa guia e proyecto di e-Government, y asina tambe enfoca riba cumplimento cu rekisitonan di Union Europeo pa cu fondonan Europeo.
E grupo aki ta consisti di un comision tecnico y tambe uno legal. E grupo directivo aki lo alinea esfuersonan di tur departamentonan publico y partnernan envolvi, asina cada instancia ta traha den un direccion comun. E paso aki ta pa garantisa cu implementacion di e sistema digital di gobierno lo core mas lihe posibel y minimalisa contratiempo.
Den e prome fase di ehecucion lo instala un systema central na cual tres departamento (DIMAS, Censo, Impuesto) lo worde conecta na dje y lo haci ahustacionnan di “software” den e departamentonan aki pa siguientemente por pasa na e proceso di continua cu mas digitalisacion di servicio. E comicion encarga ta den contacto estrecho cu Ministerio BZK di Hulanda tambe, explorando asistencia pa cu e proceso di implementacion.
E cambio digital aki ta enfoca pa pone e ciudadano prome. Den futuro e plataforma di e-Government lo permiti ciudadanonan y negoshinan completa tramite online sin mester para den fila, eliminando e cantidad halto di papel y reduci tempo di e proceso. Lo por solicita pa permiso y licencia, yega na areglo, haci pago, of cambia informacion personal manera adres – online y cu transparencia ser notifica e proceso cu ta worde encamina.
