ORANJESTAD (AAN): Qredits Aruba ta conoce otro clausura di su programa BeYourOwnBoss.
Minister di Asuntonan Economico, mr. Geoffrey Wever tabata t’ey presente pa asina tambe extende un palabra di felicitacion na e grupo nobo di graduadonan di e programa BeYourOwnBoss.
E mandatario a indica cu Gobierno di Aruba ta kere firmemente den stimula entrepreneurship, y p'esei ta contento cu Ministerio di Asuntonan Economico por a colabora cu Qredits Aruba pa asina haci e curso di BeYourOwnBoss ta mas accesibel pa comunidad, mirando esaki ta cuadra cu e vision pa stimula entrepreneurship.
“Cursonan manera BeYourOwnBoss ta siña participantenan e skills valioso di por maneha un negoshi, no solamente e administracion y mercadeo, pero tambe e obligacionnan cu pais Aruba ta exihi cumplimento cu’ne. Esaki ta importante pa por stimula mas empresario, pa nan por tin miho oportunidad pa ta exitoso”, minister Wever a menciona durante su discertacion.
Cursonan asina por yuda stimula desaroyo economico. Door di sigui educa nos comunidad, ta creando oportunidad pa mas ciudadano mehora nan talentonan empresarial y realisa nan soño of eherce nan talentonan.
“Mi ta desea tur e graduadonan exito y perseverancia pa nan por logra nan meta di ta nan propio hefe” – minister Geoffrey Wever.
