Encuanto algun situacion riba veld di enseñanza: ---ORANJESTAD (AAN) – Minister di Enseñanza y Deporte, Endy Croes, den conferencia di prensa di gobierno, Diaranzon,
a haci un repaso di e trabaonan cu a tuma lugar poco siman atras y inicio di e siman aki, tanto riba tereno di enseñanza como tambe Deporte.
El a cuminza cu e tema di enseñanza y a bisa cu como un minister nobo, e por a observa diferente inkietud y problema pa cual el a busca solucionnan, den apenas 27 dia di trabao di Dialuna pa Diabierna, aunke e ta traha tambe den fin di siman.
Instructornan di landamento
El a reitera locual a trece dilanti den conferencia di prensa siman pasa, encuanto e problema di e instructornan di landamento, cu dia 14 di October tur a cuminza nan trabao, y 24 di October si tur cos a bay bon, tur a cobra tambe, basa riba nan contrato anterior cu a wordo coregi.
33 alumno di EPB
Tambe e asunto di e 33 alumnonan, cu no por a habri un klas pa nan na EPB, na e momentonan ey. Basa riba consehonan tur el a tuma e decisionnan necesario y for di 16 di October a habri dos klas, un na EPB Oranjestad y un na EPB San Nicolas, di manera cu e 33 alumnonan aki a cuminza caba cu nan scol.
Emma School:
E dignatario a referi na otro inkietud cu tabata tin, cu ta e problema di wifi na Emmaschool, cual el a atende cune tambe y cana e caminda corecto, y esaki tambe ya caba ta regla.
No obstante, e minister a haya bishita di e cabesante di Emmaschool, Juffrouw Joselyne, ken tin 41 aña eherciendo su traba na e scol aki y awo como director.
E mandatario a expresa cu el a scucha Juffrouw Joselyne cu atencion, y tin otro diferente dolor chikito cu ta biba cerca nan, y el a pone nan riba su lista di inmediato, y a cuminza traha caba riba nan.
Por ehemplo, mester un revision total di e sistema di coriente na Emmaschool, pa despues por bin na airco, pasobra tin un problema grandi riba nan. E mandatario a pone esaki riba agenda y ta canando riba dje caba, segun e dignatario a expresa.
Tambe mester cera e cura di scol pa seguridad, y esaki a haya atencion mesora. Minister Endy Croes kier pone pueblo na haltura di cosnan chikito cu por atende mesora, y tin cosnan grandi cu kizas mester di mas tempo, y tambe di e recursonan financiero pa atende nan.
“Pero ora bo ta scucha historia di e juffrouwnan aki, por ehemplo un instructor mester subi Arubus tur mainta 5.30 or, pa core rond San Nicolas y tur e ruta pa busca e muchanan di Emmaschool, cu ta un scol mal special y mester tin structura riba e bus; no por pone tur dia otro hende, pero lamentablemente, e structura aki a wordo gestop. Si nos mira y scucha con esaki ta hinca den otro nos tin cu puntra ken ta haci e trabao?
Lamentablemente, ta e cabesante di scol of su suplente, tin cu subi bus 5.30 pa e muchanan por bin scol na un manera structura; si no, nan lo no wordo transporta. Nos a tuma decision mesora y mi a compronde cu desde dia 21 di October e instructor ta riba e bus bek”, e dignatario a duna di conoce. Y asina, el a remarca, por bisa cu ta atende cu diferente problema, na diferente manera cu tur inteligencia y cooperacion di Ministerraad y e departamentonan concerni, pa na corto plazo duna e atencion necesario.
