ORANJESTAD (AAN) – Diahuebs a tuma lugar e conferencia di prensa di Gobierno,
e biaha aki na encargo di Minister di Salud Publico y Turismo, Dangui Oduber, ken a referi na e tema di cuido di salud inclui den e Landspakket.
Minister Oduber a cuminza bisando cu, manera ta conoci, gobierno di Aruba, desde November 2021, a haci varios palabracion cu Gobierno di Hulanda, y un di e temanan cu a wordo inclui den e Landspakket ta e tema di cuido bao e letter 'F3'. E mandatario kier a comparti cu comunidad kico tur e palabracionnan cu a wordo haci, kico ta e trayecto cu ta wordo encamina te cu awo, y cual ta e proceso cu ta sigui di awo pa dilanti.
E dignatario a splica cu e tema F3 ta consisti di tres elemento: e prome ta un investigacion cu mester a haci riba eficiencia y efectividad di cuido, y naturalmente, con ta financia e cuido na Aruba. Despues di e investigacion aki lo desaroya proposicionnan concreto pa presenta na gobierno tocante accionnan cu mester wordo tuma den cuadro di eficiencia y efectividad di cuido, y tambe financiamento di cuido, pa asina por garantiza cu e cuido cu ta wordo brinda na nos ciudadanonan, ta keda sostenible y pagable. E tres fase di esaki ta implementacion di tur e proposicionnan y recomendacionnan cu wordo treci dilanti, basa riba e investigacion cu a tuma lugar caba.
Minister Oduber a señala cu tambe por repasa e trayecto cu a wordo encamina caba desde inicio di gobierno na 2017 te aworaki. E ta importante, como ministerio di salud, por garantiza cu e fondo di AZV ta keda sostenible, pa por keda brinda e pakete na e aseguradonan y naturalmente, pa e cuido ta accesible y pagable.
E mandatario a menciona cu na 2019 a laga haci un doorlichting, door di PriceWaterhouseCooper, cual a trece varios recomendacion concreto, pa AZV wordo reforma na e miho forma posible, pa asina garantiza cu e fondo ta keda sostenible.
Minister di Salud a señala cu despues di 2019 a bin e pandemia y esaki sigur a cambia e panorama, pasobra for di e momento ey gobierno a haya e instruccion di Hulanda, den luna di mey, pa corta 60 miyon florin den cuido, durante un pandemia.
Te na e momentonan aki gobierno no ta comparti e pensamento aki di Hulanda. Corta 60 miyon den cuido, Oduber ta recalca, ta hopi dificil pa cumpli cune. Den luna di Mei AZV a desaroya e asina yama “Five Ways Model” pa presente na Gobierno di Hulanda, con AZV ta pensa di por cumpli cu e recorte di 60 miyon.
