Enfoke ta pa e habitantenan di Aruba bira mas saludable --- ORANJESTAD (AAN): Durante un conferencia di prensa di Gobierno Diahuebs mainta, minister di Salubridad y Turismo Dangui Oduber a papia riba e Plan Nacional di Prevencion y
un campaña nobo lanza pa Departamento di Salud Publico den cooperacion cu Pan American Health Organization.
“Nos enfoke sigur pa e siguiente 4 añanan aki ta bay ta riba ehecucion y implementacion di nos plan nacional di prevencion”.
Mas y mas nos tin cu bay inverti den prevencion di salud di nos hendenan.
Nos ta mira cu nos ta bibando den temponan di ‘vergrijzing’(mas hende ta yega edad avanza) y nos sa cu e comunidad di Aruba no ta esun di mas saludable, segun Oduber.
El a indica cu e gastonan di AZV ta aumenta continuamente y cu e proyeccion ta cu nan lo sigui subi.
Pesey e intencion di Gobierno ta pa enfoca no solamente riba e parti curativo, sino mas riba e aspecto preventivo.
“Durante Gabinete Wever Croes 1 Gobierno a prepara un plan nacional di prevencion hunto cu DVG y un NCD‘stuurgroep’ special y esaki a wordo sosteni pa Pan American Health Organization”.
Den luna di Februari 2020 net prome cu e pandemia a cuminza, nos a lanza e plan nacional di prevencion aki oficialmente y e intencion tabata pa ehecuta e plan aki, pero e pandemia a pone cu nos mester a cambia nos enfoke riba uno pa maneha e pandemia, segun e mandatario.
El a sigui bisa cu awor a bira tempo pa sigui cu implementacion di e plan.
Segun Oduber, e vision ta pa Aruba su habitantenan tin un bida mas saludable y un mihor calidad di bida liber di malesanan cronico.
E intencion ta pa enfoca riba cambionan sostenible di comportacion di nos ciudadanonan.
“E ta un plan di ehecucion di 10 aña di 2020-2030 y e meta cu nos a pone nos dilanti pa aña 2030 ta pa nos logra reduci e mortalidad, reduci e cantidad di persona cu ta sufri di malesanan cronico y baha e gastonan di AZV, pa mantene e fondo aki sostenible”, segun Oduber.
E minister a sigui bisa cu e plan nacional aki tin diferente enfoke.
E ta un esfuerzo hunto cu e NCD stuurgroep, hunto cu tur e fundacionnan cu ta atende cu prevencion na Aruba.
“Gobierno mes a lanta un fundacion di prevencion cu hunto cu Departamento di Salud Publico ta bay ta esnan cu ta carga e plan nacional di prevencion, hunto cu e NCD stuurgroep, pa asina nos keda enfoca riba tur e areanan di e plan nacional di prevencion”, segun Oduber.
El a indica cu e siman aki mes tabata un siman importante den cuadro di e plan nacional di prevencion, caminda cu e key di limitacion riba productonan di tabaco a wordo trata y aproba unanimamente den Parlamento di Aruba.
Segun e mandatario, e ley aki ta hopi importante den cuadro di prevencion, unda cu e ley lo aumenta e edad cu por cumpra cigaria di 18 pa 21 aña, e ta bay prohibi bendemento di cigaria los, e ta bay prohibi humamento di cigaria den areanan publico y e ta bay duna e posibilidad pa duna sancion na mayornan cu ta huma cigaria den compania di menornan di edad.
“Esaki tabata un di e puntonan cual PAHO mes a conseha Gobierno di Aruba pa atende cune y nos a prepara e cambionan necesario”, segun e minister.
El a bisa cu e ta gradici Parlamento di Aruba cu a aproba e ley unanimamente.
Segun Oduber, e areanan riba cual e plan nacional ta bay enfoca y ta bay monitor y evalua pa e siguiente añanan cu ta bin, ta mortalidad prematuro, malesa di cancer, uso excesivo di alcohol, uso excesivo di tabaco, diabetis y obesidad.
Ta enfoca tambe riba un mihor dieta.
Pesey ta trahando entre otro tambe riba un centro di Obesitas.
