ORANJESTAD(AAN): Minister di Enseñanza y Deporte Endy Croes durante su conferencia di prensa Dialuna a papia riba e asunto di instructornan di landamento.
“Un otro solucion cu nos a logra den apenas 2 siman di trabao ta e solucion pa e asina yama zwem instructeurs”.
Nos sa cu e ex minister encarga tabata tin algun dificultad cu e parti aki.
Nos sa tambe cu desde Juni na final di aña escolar e contratonan di e instructornan di landamento cu ta alrededor di 22 persona cu ta practica e profesion pa un average di 28 aña caba.
Cada aña mester renoba un contrato annual, segun e mandatario.
“Nan contrato a wordo cambia pa un ‘Overeenkomst van Opdracht (OvO) y mas cu claro na e momento ey despues di tanto aña, nan a perde tur e derecho den e siguiente lunanan pa cobra e toelagen cu nan tabata cobra den nan contrato anterior”.
Nos ta haya cu ta un trabao bunita y importante cu pa un average di 28 aña nan tabata haci pa Gobierno, esta duna nos muchanan zwemles den derde klas. E ta un proyecto di cual nos ta sinti cu e mester continua, segun e minister.
El a splica cu tabata tin e deseo pa traspasa e instructornan di landamento pa IBiSA y na mes momento Gobierno a pidi DRH pa un conseho huridico y un solucion mesora. “Nos a pidi pa un solucion mesora, pasobra nan sindicatonan Simar y SEPPA tambe tabata preocupa riba nan situacion”.
Pesey mi ta contento pa bisa cu un conseho di DRH cu mi a haya, mi a hiba esaki pa Ministerraad pa nos tuma un decision cu ta sosteni y carga pa Ministerraad den su totalidad, segun Croes.
El a trece dilanti cu e Ministerraad mester a draai bek un decision di e Ministerraad anterior , unda cu awor e instructornan di landamento ta bay cay bek bao di DPS, en bez di manda nan pa IBiSA.
“Nos a percura pa tin un presupuesto pa nan y nan a keda contento”. Directie Onderwijs y DRH bayendo dilanti lo sigui sondea con den futuro por drecha esaki na un manera quizas ainda mihor, segun Croes. El a sigui bisa cu banda di a regla nan contrato, mester a percura pa tin fondonan pa e busnan cu ta busca e muchanan na scol pa hiba nan e lesnan y bin bek.
Den e presupuesto actual a logra haya un suma di alrededor di 300 mil florin esaki, e mandatario a splica.
