Advertencia DIARIO cu Hulanda ta pais soberano den Reino ta valido
*Ministro ta nenga condecoracion na colaboradornan asilo politico
*Alarma mester cuminsa resona na parti Caribense di Reino Hulandes
ORANJESTAD (AAN) —Na e momento cu e resultado historico di ultimo eleccion Hulandes a bira conoci, DIARIO cu lazonan directo den Reino, a cuminsa informa Pueblo di Aruba cu por spera cambionan importante den e forma cu pais Hulanda ta atende cu migracion.
DIARIO, conocedor di e reglanan cu ta base pa Reino Hulandes, na e momento aki ta bolbe adverti, cu mester sostene e maneho di menos dependencia posibel di Aruba di Hulanda, den cuadro di e fundesho di e areglo unico cu yama Statuut.
Cambionan grandi ta tumando lugar na nivel internacional y DIARIO basa riba su red internacional di coneccion na nivel halto, ta lanza advertencianan serio na publico di Aruba.
Uno di nan sigur ta e realidad, cu ciudadanonan di Reino Hulandes cu ta biba den region di Caribe, ta goza di un posibilidad cu no ta existi pa e ciudadano Hulandes, cu ta biba na Hulanda.
Pa un ciudadano Hulandes, cu no a nace na Aruba por establece su mes na Aruba, e mester di permiso mientras cu ciudadanonan Arubano por establece nan mes libremente na Hulanda.
Esaki ta haci cu Hulanda a suavisa problemanan social di e paisnan Hulandes den region di Caribe ya cu e ciudadanonan Hulandes biba na paisnan Hulandes den Caribe, por drenta y biba sin necesidad di permiso na Hulanda.
Cu cambio grandi a presenta su mes den e forma cu Gobierno di Hulanda y tur gobierno y representantenan regional di e pais, ta pensa, ta bini dilanti den e forma cu Hulanda awor ta atende cu asilo politico.
Realmente na Hulanda, asilo politico a bandona su limitenan y entre otro e escacez di trahador den cierto ramonan na e pais, a habri caminda pa refugio wordo duna na miembronan di poblacion na diferente pais.
Un peso grandi a wordo crea pa e Hulandes mes, sigur despues cu areglonan di Union Europeo tambe a cuminsa conta na e pais, afecta pa situacion despues di Segundo Guera Mundial y cambionan den Reino na Este, Oeste y na Europa.
Informantenan clave ayera a bolbe asegura DIARIO cu sucesonan cu awe mester topa cu un decision, ta indica claramente cu e Arubiano mester cuminsa bandona e pensamento cu Hulanda lo mantene su porta sin mas habri pa habitantenan di otro pais den Reino, cu ta uza nan pasaporte Hulandes pa establece sin permiso na Hulanda.
Awe na Den Haag un asunto sumamente serio cu lo mester afirma e posicion di e partido mayoritario Hulandes enfrente migracion, lo mester duna un contesta cla.
Loke por manda Gobierno di Hulanda cas, lo ta basa riba e hecho cu Ministro Faber a dicidi cu e no ta firma pa condecoracion real pa cinco persona, cu a asisti den asistencia na personanan cu ta busca asilo politico na Hulanda.
Ministro Faber a mustra cu e condecoracion di e persona envolvi lo ta contra su decision pa corta migracion na Hulanda pasobra e motibo di condecoracion no ta di acuerdo cu su maneho.
Gobierno Hulandes lo cay pa e desaroyo aki? Esaki tabata e pregunta grandi ayera.
E dirigente Hulandes, Geert Wilders, ganador absoluto di eleccion na Hulanda, ayera a considera un locura total, cu partidonan opositor di Gobierno, kier entrega un mocion di desconfianza pa asina baha Ministro Faber.
Mientrastanto ayeratardi Schoof y Uitermark a duna di conoce cu nan ta dispuesto pa firma pa e condecoracion wordo otorga.
“Hulanda pa Hulandes cu mes derecho cu ciudadanonan na otro parti di mundo y e derecho pa defende e interes di e Hulandes Europeo, ta loke ta resalta awor den Reino,”informacionnan ta indica.
A wordo mustra na DIARIO cu mundo politico na Den Haag, sigur tin atencion pa loke nan ta considera falta di balansa den Reino Hulandes, caminda sigur trafico entre e paisnan di Reino y domicilio den Reino Hulandes, mester ta na fabor di e ciudadano Hulandes naci na Hulanda tambe.
