ORANJESTAD (AAN): Siman di Ambulans ta algo unda tur trahador ta refleha riba loke a pasa den e aña tras di lomba.
Pero tambe ta un bon chens pa mira riba e futuro di e servicio sumamente esencial aki pa Aruba.
Liberato Hoek, kende ta Operations Manager Ambulancezorg di ImSan, a indica na DIARIO cu recien mes nan a tuma 7 personal nobo pa e parti di Enfermeria. Esakinan ainda tin di haya e opleiding cu ta wordo duna via di Hulanda. Sinembargo debi na e pandemia, e opleiding aki no por a cuminza ainda pa e 7 trahadornan aki.
E bon noticia ta cu e cantidad di personal aworaki pa servicio di Ambulans ta uno bon, y esey por ta un garantia pa un bon servicio na publico. Ademas e meta cu nan tin ainda nan dilanti, ta pa cada Warda por dispone di 4 unidad di Ambulans.
Aruba tin aworaki 3 Post di Ambulans. Uno di nan ta den Schotlandstraat, uno na ImSan na San Nicolas, y e central ta poni na Wayaca. Aworaki na cada post tin 1 unidad di Ambulans durante warda. En total aworaki Aruba tin 10 unidad di Ambulans.
