Segun Romely Flanegin di Tienda di Educacion:
ORANJESTAD (AAN): Carnaval na Aruba ta un festival di goso y alegria den un periodo largo y cu hopi actividad y evento. No solamente adulto ta gosa e temporada aki pero nos muchanan tambe ta gosa di e colornan y creatividad durante eventonan di Carnaval. Pero, den caso di nos muchanan, mayornan mester ta consciente di e beneficionan y e riesgonan cu por tin pa nos muchanan y na ki edad lo ta adecua pa hiba nos muchanan wak of participa den e eventonan.
Den un entrevista cu DIARIO, señora Romely Flanegin di Tienda di Educacion a remarca, cu ainda no tin un mencion di edad specifico cu muchanan por participa na Carnaval of na eventonan di Carnaval. E ta duna un ehempel di Tumba Festival na unda cu riba e flyer ta poni cu muchanan bou di 12 aña ta drenta gratis pero no ta indica e limite di cua edad por ta presente. Por lo tanto ta comprende cu muchanan di 0 pa 12 aña ta drenta gratis.
El a agrega cu aña pasa a sinta cu Presidente di SMAC riba esaki pa yega tambe na e gruponan di Carnaval cu ta bay cu muchanan hopi chikito den paradanan di Carnaval. E pensamento cu si kita muchanan chikito for di Carnaval, ta caba cu nos cultura, no ta e meta di e fundacion. E meta ta pa percura cu nos muchanan ta safe y pa ta consciente di e decisionnan cu nos ta tuma como grupo di Carnaval, como Smac pero sigur como mayornan. El a agrega cu ta hunto por traha riba reglanan di entre otro edad di eventonan y pa asina mayornan sa cua evento di Carnaval nos muchanan por bay.
Señora Flanegin ta conseha pa mayornan cu no tin oppas pa nan yiunan durante paradanan di Carnaval, sigui nan riba nan paginanan social na unda cu nan lo publica luganan unda cu nan por laga nan yiunan hunto cu otro muchanan den un ambiente sigur y por busca nan despues cu nan gosa di nos dushi paradanan di Carnaval.
