Segun Misha Raymond di Respaldo:
ORANJESTAD (AAN) – Varios pais na Europa a cuminsa adopta ley y regla relaciona cu e maneho y uzo di internet. Segun señora Misha Raymond di Respaldo, ta importante pa Aruba tambe cuminsa tene e discusion aki cu urgencia, particularmente tocante acceso di muchanan na internet y e contenido na cua nan ta wordo exponi.
Raymond a splica cu internet y mundo digital ta ofrece muchanan diferente forma di participa den sociedad. Sinembargo, e impacto no ta mescos pa tur mucha. Esnan cu ya caba ta vulnerabel por bira ainda mas vulnerabel, mientras cu muchanan cu tin mas resiliencia por logra beneficia di e oportunidadnan cu un bida online ta ofrece.
E reto, segun Raymond, ta pa identifica cua muchanan ta beneficia di internet y cua ta core riesgo di wordo afecta negativamente.
Durante un conversacion cu Ton Liefaard, hoogleraar den derecho di mucha, Raymond a puntra cua desaroyonan internacional Aruba tambe mester tuma na cuenta. Como pais chikito, Aruba tin posibilidad pa yega na informacionnan adecua y e posibilidadnan pa yega na desaroyo di yiunan. Teniendo na cuenta cu e efectonan di internet ta hopi mas limita si compara esaki cu paisnan grandi, cu ta tiki mas lihe con pa atende cu esaki.
Segun Raymond, Aruba mester considera stipula un edad minimo pa un mucha haya acceso na internet of cierto plataforma digital. Na cierto edad, e cerebro di un mucha ainda ta den pleno desaroyo y e mucha no tin ainda e habilidad pa tuma decision, pensa di manera racional y evalua e contenido cu nan ta wak.
Pa e motibo aki, segun Raymond, discusion no mester limita su mes na e pregunta si un mucha mag di tin acceso na internet. Mester analisa tambe na cua edad e acceso ta apropia, na ki tipo di contenido muchanan ta wordo exponi y cua medida por tuma pa proteha nan sin laga afo e beneficionan di mundo digital.
Social media ta forma un parti grandi di nos bida y desaroyo. Pa e motibo ey, Aruba mester determina kico nos ta permiti den bida digital di nos muchanan, unda mester pone limite y con por guia nan pa haci uzo di internet den un manera mas consciente, responsabel y sigur.
