Alternativa pa reemplaza contribucion propio:
ORANJESTAD (AAN) – Minister di Salud y Turismo, señor Dangui Oduber, a toca e tema di Eigen Bijdrage (contribucion propio), den e conferencia di prensa di gobierno, Dialuna 1 di Augustus.
E dignatario a confirma cu gobierno a tuma e decision pa no continua cu esaki, pasobra e no ta di acuerdo cu e pensamento di CAft, debi cu nan a bisa cu nan no ta di acuerdo pa banda di e Eigen Bijdrage bin un vang net.
E dignatario a splica cu CAft a bisa cu e vang net cu nos a presenta, tin demasiado persona den dje, y gobierno a propone un manera pa financia e Eigen Bijdrage aki tambe, atravez di un begrotings fonds. CAft tabata tin un opinion negativo riba esaki y no a bay di acuerdo cune, locual a conduci cu gobieno a busca otro alternativa, pa reemplaza e contribucion propio riba medicamento.
“Es mas, e Eigen Bijdrage mester a spaar entre tres pa cuater miyon florin. E alternativa nos a bay buske den remedinan, manera nos a informa CAft tambe, y e motibo pakico nos no ta sigui cu introduccion di e contribucion propio, nos a splica nan tambe durante reunionnan y a comparti tur e informacion aki cu nan, y kico nos ta bay haci na lugar di eigen bijdraag y cu kico nos ta reemplaza esaki y cuanto esaki lo por bespaar den e tarea cu nos tin di reforma e casonan di AZV”, e minister a declara.
E mandatario a splica cu nan a haci un estudio unda a conduci diferente sesion cu importadornan di remedi, AZV, Inspeccion di Remedi, Boticarionan, y a base di tur e reunionnan aki, y di estudionan cu a wordo haci conhuntamente cu AZV, a conclui cu tin un potencial hopi grandi pa moderniza e leynan y baha gasto di remedi.
“Den e cuadro aki, esaki ta e alternativa cu nos a presenta na CAft, cu envez di sigui cu e eigen bijdrage cu ta bay afecta e asegurado, nos ta bay enfoca na baha y reduci e gastonan di remedi. Pesey, nos ta bay haci cambio den e Decreto di Remedinan, ‘landsbesluit verpakte geneesmiddelen’ y a base di e siguiente puntonan di cambio, nos ta bay percura pa baha e gastonan di remedi, pa asina nos por yega tambe na cumpli cu e reformanan cu nos tin cu cumpli cune, conforme e instruccion cu nos a haya di BZK di Hulanda cu tambe ta para den e acuerdonan cu nos tin cu Hulanda pa haci e reformanan aki”, Minister di Salud a señala.
