Minister Mervin Wyatt-Ras:
ORANJESTAD (AAN)-- Siguiendo cu e tema di abuso di adulto mayor, den entrevista cu Matutino DIARIO, Minister Mervin Wyatt-Ras a señala cu Departamento di Asunto Social, cu ta cay bao su encargo tambe, ta tuma contacto cu famianan di adulto mayor cu a bira victima di abuso, y tambe ta atende cu nan.
“Mi ta kere cu nos no mag di acepta ningun abuso den nos comunidad, y na momento cu ta trata di abuso di adulto mayor, cu a zorg pa nos tur, hopi biaha nan ta drenta den un etapa di nan bida cu nos tambe tin cu bay zorg pa nan.
“Y nos comunidad tin cu uni mas p’asina nos tin bista riba nan, pero tin biaha nos ciudadanonan, pasobra nan tin cu haci diferente trabao, no tin tempo pa wak pa otro. Mi ta kere cu mescos cu nos ta bisa ta tuma un comunidad pa lanta un mucha, mi ta kere ta rekeri di un comunidad pa cuida nos adulto mayor”, e dignatario a expresa.
“Esaki ta un momento pa nos reflexiona, pero nos ta kere den accionnan concreto door di un ‘meld punt’ pa por haya un miho bista di cuanto caso tin, y por yuda pa wak kico asina mas mester haci pa duna concientizacion na pueblo, pero tambe proteha personanan cu ta victimanan di abuso” Minister Wyatt-Ras a resalta, indicando tambe cu den ley tin proteccion pa esaki.
