Den culminacion di Omigron un inversion di 100 Miyon pa Aruba --- *Proyecto Mericano Eagle LNG lo ta fuente di actividad na 2022 --- *Importacion Europeo ta mustra cu plan 2022 Wever-Croes ta corecto
ORANJESTAD(AAN)—2022 a habri na e forma cu DIARIO a adverti.
Mientras 2022 a bati na porta, DIARIO a sigui vigila tur desaroyo mundial pa un aña cu lo bira decisivo pa humanidad riba termino cortico y largo.
Mundo prome cu 2022 a haci su entrada no a sinta keto pero a sigui traha riba un futuro den cual economia ta central pa por produci e factornan esencial pa comunidad y hende.
Economia ta fuente di trabou, di actividad cu ta genera placa pa tur sector di comunidad y asina ta habri posibilidadnan pa por atende cu tur resultado di e pandemia Covid-19.
Mester tene na consideracion cu for di awor mester planifica e futuro ora domina Covid-19 y cuminsa traha riba un recuperacion, cu mester haci posibel pa paga debe cu a crea durante e pandemia.
Paisnan, negoshinan y trahadornan den e pandemia a topa cu situacionnan cu a kibra nan forsa financiero.
E mundo di inversion mundial a continua den inversionnan internacional.
Ta hustamente den temporadanan manera di pandemia y problema financiero, inversion ta haya un lugar central.
Manera lectornan di DIARIO por proba, DIARIO a sigui tur desaroyo cu lo mishi cu e calidad di bida na Aruba, cu manera awor ta wordo confirma dor di tur sector di turismo, mester sigui mira e fragilidad di turismo como pilar economico.
DIARIO semper a insisti cu balansa economico di un pais no por ta basa solamente riba turismo, cu e industria cu tin mas facilidad di crece pero tambe conoce un grado halto di peliger.
Na e momentonan aki, instancianan oficial ta mustra cu e ola di Omicron a afecta e pronosticonan cu tabata tin di turismo. Tin tur indicacion cu ainda e peliger mas grandi pa turismo, mester bati na porta.
Den e cuadro aki, diversificacion di economia ta haya un lugar mas importante.
Na 2021 DIARIO a pone enfasis riba e proyectonan di Eagle LNG y Quanten den un periodo cu investigacion periodistico ta rekeri pa tene realidad na bista debi na e forma cu cambio di clima ta mishi cu e companianan di petroleo y gas.
Cifranan cu a wordo produci na inicio di 2022, awor ta confirma e importancia di e proyecto Eagle LNG pa Aruba.
No solamente e caida di prijs di awa cu Eagle lo genera lo ta importante pa Aruba cu mescos cu henter mundo lo conoce aumento di prijsnan di necesidad basico, aumento di costo di bida, inflacion.
Importante na 2021 tabata e discusion si Aruba mester sigui cu e proyecto di gas debi na e palabracionnan di clima.
Investigacionnan di DIARIO ta indica con actualmente mundo ta pendiente di desaroyonan riba tereno di gas, cu tin cientificonan tambe na careda den creacion di tecnologia cu lo haci gas un fuente mas limpi di energia.
Union Europeo ta realisa estudionan pa mira e lugar cu tecnologia lo duna gas mas limpi cu actualmente ta e caso.
Eagle LNG ta un compania Mericano, cu tin sosten di Gobierno Mericano pa haci negoshi cu Aruba.
Esaki ta un factor sumamente importante den e programa di Gabinete Wever-Croes ya cu gas natural por habri caminda no solamente pa WEB haya gas, pero pa Aruba diversifica su economia cu entre otro atraccion di mas barco cu ta uza gas como combustibel.
Pa comprende kico esaki ta nifica mester mira con Union Europeo, cu uno di e luchadornan mas ferviente pa combustibel limpi, ta haci un estudio nobo di gas y energia nuclear, den luz di tecnologia nobo, cu ta deshaci di mas di e ingredientenan di gas cu por afecta clima mundial.
Merca, cu ta pais origen di Eagle LNG, na 2022 segun cifranan oficial, lo exporta mas gas cu Qatar y Europa lo ta uno di e centronan mas grandi di importacion di gas Mericano.
LNG Mericano, cu ta mara na reglanan comercial di Gobierno Mericano, lo haci su entrada na Aruba na 2022 y por spera cu asina mas actividad economico lo presenta na Aruba, cu tambe ta sigui negocia cu e compania Quanten, un refineria tambe basa riba cambionan di clima.
Informacionnan di DIARIO, cu ta sigui investiga tur aspecto cu ta afecta e Arubiano, ta confirma e expresion di Prome Ministro Wever-Croes cu 2022 lo bira aña di inversion economico y asina recuperacion financiero y social pa Aruba!
