Caya a bira peligroso den fin di siman - ORANJESTAD (AAN): E weekend aki tabata uno hopi druk mes riba caya rond di Aruba.
Desde Diabierna caba tabatin hopi movimento, trafico stagna, y negoshinan cu musica celebrando comienzo di vakantie. Diasabra tambe el a sigui den mesun direccion.
Diadomingo madruga un situacion hopi serio a presenta su mes na Lekker Bar & Restaurant cu ta situa na Noord. Esnan cu tabata disfruta di bida nocturno den e negoshi, a bin ripara despues cu un of mas persona a los hopi tiro riba e autonan staciona pafo, causando daño material na body di e vehiculo, y tambe na diferente glas di vehiculonan. Tin indicacion cu 8 auto a haya bala.
Ken tin di culpa pa e cantidad di arma cu tin riba caya? Kende mester bin cu e iniciativa pa purba di habri algun siman voluntario pa conocido programa unda autoridad ta pidi pueblo pa entrega arma back sin cu tin consecuencia pa e ciudadanonan.
Ta parce cu e fenomeno di ‘Muchaho Malo’ a haya un momentum inespera den simannan, principalmente e ultimo fin di siman cu a caba di pasa. Comosifuera hendenan cu diripiente tin un arma di candela den nan poder, tabata ancioso di hopi tempo caba pa asina los tiro, pa gasta tur municion cu nan tin, sin ningun preocupacion si acaso e lo por nifica nan fin di libertad y pronto comienzo di un bida amarga den Prison di KIA na Aruba.
Ta parce cu hopi hende ta cana cu mente di ‘Bad Boy’, y ta lubida completamente cu awor ta rond di Aruba tin hopi hende cu security video camera instala na cas y edificionan, cu facilmente por yuda autoridad hudicial haya sa ta kende ta esnan cu ta comete fechoria riba caya.
Den fin di siman cu a pasa, e tabata uno yena cu dolor di cabez pa Polisnan na Aruba. Como cu den menos di 2 luna tabatin drive-by shooting, tiramento riba hende, y hasta tiramento den cas, a dicidi pa subi caya pa controla tur loke tabata pasando.
El a cuminza Diabierna unda pa colmo e docentenan a celebra nan ultimo dia di trabao, cu a bira conoci como ‘Spula Krijt’. Ademas di busca esnan cu ta comete violacion di ley di arma, Polisnan a haya nan ta atende hende riba caya cu ta core burachi tras di stuur, y tambe problemanan cu semper ta worde impulsa door di alcohol.
Algun observador ta indica, cu e problema di criminalidad bao di hubentud y esey ta conta te hasta pa esnan entre 25 pa 45 aña... ta cerca mayornan mes.
Respet no conoce temporada y no ta algo cu por permiti bay for di moda. Ta imposibel pa kere cu mayornan no sa kico nan yiunan ta haci riba caya si tin tanto publicacion di potret y grabacion di video, unda tur hende por wak ta ken ta esnan cu no ta comporta nan mes.
Antes algo asina pasa; ora cu bo yega cas ta bo number lo hunga cerca bo mayornan. Tempo supuestamente a bira moderno y mayornan no mag di ta streng mas cu nan yiunan y ata e resultado ta worde geplak den cara di comunidad tur siman cu actonan violento riba caya.
E actonan riba caya ta tumando un rumbo mucho peor cu e videogame di Grand Theft Auto. A lo menos den videogame bo por primi e boton di ‘reset’ y tur cos ta bek na ordo. Pero den bida real, e persona cu bo ta mik arma riba dje y tira... e ta fayece di berdad! Ey no tin nada di primi boton di reset.
