Segun CEO di AHATA, Tisa LaSorte:
ORANJESTAD (AAN) – Tisa LaSorte, CEO di Aruba Hotel and Tourism Association (AHATA), a comenta tambe, den su entrevista cu DIARIO, cu den su experiencia tempo cu e mes a traha den hotel, el a mira con ora nan tabata cambia nan empleadonan di un sistema di service charge, cu ta un tiki mas sigur, na uno di tips nan a bira contento pasobra nan ta ricibi mas placa, y riba tips no ta paga impuesto.
Pues, no solamente e trahado ta gana mas placa pero e ta tene mas placa pasobra e no ta paga impuesto. Gobierno a dicidi cu no ta cobra impuesto riba tips. Pero cu service charge si mester paga impuesto.
LaSorte a indica cu tin hopi storia cu hendenan cu ta gana a base di tips no por yega na un cas propio, no obstante e sa cu tin di nan a yega na nan cas, y hasta tin dos of tres cas y tin cu a bay na “vacation rental business”.
Tampoco ta asina cu e trahadornan aki no tin acceso na fianza na banco. Tisa LaSorte a puntra na banconan y el a wordo splica cu nan ta tuma un porcentahe di e suma. Ademas, esnan cu ta gana na tips por spaar di manera cu no tin nodi haci debe. E cultura di mester bay den debe, no ta algo cu necesariamente mester ta e motibo pakico un trabao no ta atractivo.
El a agrega cu ora bo papia di tips, esnan cu ta duna miho servicio ta gana mas. Tambe e ta depende di ki ora e persona ta traha y tambe ki horario e ta prefera. Su feedback, LaSorte a subraya, ta cu net e tipo di trabaonan ey ta atractivo pa e tips cu nan ta gana. El a bisa tambe cu semper por tin excepcion.
E ta kere cu door di e pandemia hopi dunador di trabao ta pensa kico nan mester cambia, si ta e tipo di beneficionan cu nan ta duna mester cambia pa ta mas creativo, si nan ta paga mas. “Mi a tende di hopi di mi miembronan cu a cambia nan structura di salario pa paga e trahado mas. Pues, hopi cos ta cambiando semper, y si bo falta hende pa traha bo mester haci algo pa atrae hende”, el a remarca.
El a agrega cu e mester bin di varios direccion, con mester drecha e problema aki. “Mester wak si nos por yuda e sistema di educacion pa drenta e sector, mester yuda wak enberdad cuanto trabao por ofrece, cu no tin nodi bay scol pero por train na trabao, y bo mester wak bo plan di compensacion di salario, pa kico bo por haci como dunador di trabao pa mi ta mas atractivo cu otro dunador di trabao. Esey ta parti di e competencia cu ta tuma lugar tur dia y ta parti di e analisis cu bo mester haci”, Tisa LaSorte, CEO di AHATA a conclui.
