Hose Figaroa, Presidente di FTA:
*E pregunta ta: si Aruba ta prepara pa importa 1500 pa 2000 trahado?
ORANJESTAD (AAN) – Siguiendo cu e entrevista cu Presidente di Federacion di Trahadornan di Aruba (FTA) Hose Figaroa a haci cu DIARIO, el a trece dilanti otro punto cu mester tene na cuenta, ora di importa trahado, mirando e necesidad cu tin di hende pa traha na Aruba, vooral sector horeca.
El a mustra su preocupacion cu na dado momento e situacion por crea un asina yama “canivalismo” entre e hotelnan mes.
Figaroa a indica cu un maneho cu semper tabata tin na Aruba, ta cu un trahado importa no por busca su casa of pareha pa tambe e traha, pasobra no por duna dos permiso hunto.
E siguiente aspecto ta kico ta trece cu ne, ta cu na lugar di dos vivienda e pareha ta biba un lugar bao mesun dak, cu aunke e problema di importacion di trahado ta keda mesun cos, e problema di vivienda ta bira menos. “Mester tene cuenta cu importa trahado ta un cos, pero e trahado ey mester di un caminda pa biba. Pues, e presion cu ta bay pone, entre otro, riba infrastructura, entre otro vivienda, tambe mester tene cuenta cu ne. Aworaki ta wordo bisa cu mester importa mas di mil trahado, pero na unda nan ta bay biba? El a enfatiza “nos a prepara p’e? Nos tin suficiente vivienda pa tur trahado, cu ta wordo bisa cu mester importa? 1.500 ta e cifra cu mas ta wordo menciona, pero ban sali for di punto di bista cu ta rond di 1.500 pa 2000. Na unda ta bay pone e hendenan aki pa biba? E hendenan aki ta bay tin derecho riba AZV, y tur e tipo di beneficionan ey. Con bo por carga e aumento aki den un tempo relativamente cortico?” Hose Figaroa a remarca.
El a reitera cu tin algun di e hotelnan cu ta cla pa habri, cu ta bendiendo camber entrante mitad di December. Pues, aki un par di luna e hotelnan aki ta programa pa habri. Un bez mas Figaroa ta puntra con ta bay haci pa importa tanto hende? Con leu nos maneho ta pa bay wak bao di ki condicionnan ta importa hende.
“Y e peliger ta tambe, entre mas bo tarda pa importa hende, bo ta bay haya por ehemplo loke nos ta yama ‘canivalismo’ den e sector hotelero mes, unda hotelnan nobo ta bay purba saca hende di e hotelnan existente pasobra nan mester di trahado, pasobra aworaki bo ta bay crea gaps tur caminda door di no bin cu un maneho na tempo…nos ta laat caba pa hiba un maneho na tempo, pero esaki ta birando cada bez mas cortico c cada bez. Nos ta papiando aworaki di un cinco lunanan ey, prome cu nos ta para riba e hecho cu e cambernan di hotel ta bay habri”, Presidente di FTA, Hose Figaroa a bolbe enfatiza.
