SANTO DOMINGO: E instancia encarga na Republica Dominicana pa control di productonan pirotecnico,
a indica cu nan a caba di destrui 909.759 pida di klapchi cu a wordo confisca durante temporada di Pasco y Aña Nobo 2022.
Nan a actua fuerte contra e distribucion ilegal, pasobra e ta trece hende y propiedad den peligro, specialmente ora hendenan cu menos experiencia bay tira nan, principalmente muchanan ta esnan cu mas a wordo afecta.
Segun autoridad di e pais, hasta klapchinan cu ta parce di ta inofensivo, manera esnan di ‘Galiña ta pone Webo’, por causa quemadura di 1.200 grado, y hopi biaha ta haya muchanan ta trata di yega cu nan man cerca y asina ta trece nan mes den riesgo.
Loke nan a confisca ta klapchi cu a wordo importa y distribui ilegalmente. Na Republica Dominicana mes no tin fabrica, y tin hasta ley cu ta prohibi esey. Tambe ta poni cu importadornan mester ta registra y autoriza na Gobierno. Pues companianan ilegal cu ta distribui clapchi, ta core riesgo di perde tur nan mercancia, y e propietarionan por hasta wordo cera den prison.
