Gregory Fung-a-Fat, coordinador di PHITO Aruba:
*Aruba y Bonaire so den Caribe ta den dje
*E app ta keda full anonimo
ORANJESTAD (AAN) – DIARIO a entrevista señor Gregory Fung-a-Fat, Coordinador di e proyecto “PHITO” Aruba, cual ta consisti di un app (yama PHITO), cu ta den desaroyo, den cual 21 pais ta participando, 19 di nan ta Europeo y dos den Caribe, cu ta Aruba y Bonaire.
Fung-a-Fat a duna di conoce cu awo ta trahando riba e app aki, cual obhetivo ta wak kico tur nos ta haci, den nos caso Aruba, riba produccion di cuminda.
“Aworaki nos ta den e fase cu nos ta cla pa e cunukeronan duna nos feed back. Y feed back no ta solamente pa wak kico e app ta haci pero pa wak kico nos kier pa e app haci pa nos.
“Dus, aworaki nos a lanza algo cu ta duna bo idea, pero e contenido nos ta puntra pa e cunukeronan approach nos y duna nan punto di bista, kico nan ta kere cu ta esencial.
“Un ehemplo lo ta, un cunukero cu ta desea di wak kico e tempo ta bay mustra pa e siman. Por ta nos ta hink’e den e app. Por ta mi no por bende mi producto, por ta nos por tin cu traha un plan, unda cu hende por lansa nan mes den e app, bisa ok, esaki ta e productonan cu nos tin accesibel, y viceversa. Tin diferente otro factor, pero esaki ta un idea, kico e app por duna nos comunidad”, Gregory Fung-a-Fat a señala. El a subraya si, cu hopi biaha e cunukeronan tin temor di divulga, y nan ta apero e app aki ta bira completamente anonimo.
El a relata cu esaki no ta algo cu e mes a diseña, sino conhuntamente cu un colega cu ta aworaki na Aruba, cu a skirbi pa un proyecto na Union Europeo y nan ta haya un presupuesto di E.U pa por lanza e app aki.
“E buniteza di esaki ta cu el a traha e network unda Aruba por participa den dje, y busca mas informacion tocante agricultura, y e di dos ta cu aworaki bo no ta wak e, pero dies aña pasa nos tabata tin smartphone y awo tur hende tin e. Pues, tecnologia ta cambiando y nos tin cu cambia tambe, con nos ta haci miho uzo di tecnologia”, Fung-a-Fat a subraya.
E proyecto aki a cuminza na aña 2023 y e ta pa cinco aña largo, pues na 2028 y por haci uzo di dje.
El a indica cu un di e bentahanan ta cu ora tin suficiente produccion local, por traha un market place, pa cumpra directamente. Fung-a-Fat a trece dilanti cu na Aruba tin hopi cunukero, pero pa un restaurant cu ta busca un producto yama 20 number, no ta factibel. “Pero si tin un espacio unda tur producto ta wordo poni hunto, cu un ‘klik’ ta hopi mas factibel cu cuminza pensa unda tin cu toca porta pa haya producto local”, Gregory Fung-a-Fat a menciona.
El a agrega cu e app aki ta duna oportunidad di haya data, pasobra hopi biaha bo ta bay busca ayudo na gobierno of departamento, nan ta bisa si, “pero sin data mi no por yuda bo”.
