ORANJESTAD (AAN): Den cuadro di e produccion di e cinema documentario “Dande di Aruba, un tradicion tipico di Aña Nobo”,
Fundacion Mi Cutisa den colaboracion cu Archivo Nacional di Aruba (ANA) a publica un Mapa Preliminar di Cantadonan di Dande di Aruba (mira potret adhunto). Esaki ta nifica cu e mapa aki ta fungi como introduccion pa trata e comienso di un registracion di e cantadonan di Dande di Aruba, pa asina traha un lista di tanto cantadonan di pasado como di presente.
Meta di e mapa di cantadonan di Dande ta pa yega na un lista di persona cu tabata of ta un cantado di nos tradicion di Dande. Otro meta di e lista aki ta pa duna un bista di cua districto e cantadonan di Dande ta bini of core paranda. Tambe ta e intencion pa registra e fecha di nacemento di e cantadonan di Dande pa asina haya sa kende tabata e cantado di Dande di mas bieu di Aruba y di unda e ta bini?
Un di e criterianan cu a mantene pa registra un cantado di Dande ta cu e cantado di Dande mester a core paranda di Dande como un ‘cargado’ di nos tradicion di Dande. Esaki kiermen pa awor solamente a registra e cantadonan. Ainda no a registra e gruponan di Dande completo, esta kende tabata e tocado- y lider di gruponan etc.
Otro criteria pa por a pone un persona riba e Mapa di Cantadonan di Dande ta cu mester registra e nomber completo di e persona, su fecha di nacemento y eventual fecha di fayecemento, den caso cu e cantado no ta na bida mas. Importante den e registracion aki ta cu mester skirbi e nomber di un persona corectamente y mester por confirma cu e fecha di nacemente y fayecimento ta corecto. Tambe ta importante cu tin varios hende cu ta confirma cu un persona a of ta pasa paranda di Dande y di cua districto e persona aki ta.
Sin e datonan aki no por pone e cantado riba e mapa pa por analisa e datonan.
Pa por a yega na e lista di cantadonan di Dande, sra. Ruby Eckmeyer a cuminsa traha for di aña 2011 hunto cu Jhon Freddy Montoya y Jessica Rosel, kendenan a sigui e curso di Historia Oral na Universidad di Aruba. Hunto nan a forma un grupo di documentacion di e tradicionnan di fin di aña na Aruba. E tempo ey sra. Eckmeyer tabata traha na e Centro di Desaroyo y Investigacion di Universidad di Aruba. Hunto cu sra. Shailiny Tromp-Lee kende tabata hefe di e Seccion di Investigacion y Documentacion di Departamento di Cultura Aruba (DCA), nan a cuminsa implementa y coordina e Proyecto Expedicion Rescate. Esaki ta un proyecto pa documenta nos herencia immaterial pa medio di Historia Oral. Na 2019 sra. Eckmeyer a haya sosten di Nelson Tiel, empleado di ANA y di sra. Bertha Wolff, kendenan a yuda buska y confirma e datonan di nos cantadonan di Dande den colaboracion cu sr. Harry Croes, ex presidente di Festival di Dande di Aruba. Via algun programa na radio a purba di haya mas informacion di nos cantadonan di Dande y a tuma contacto cu DCA y varios persona pa haya dato di mas tanto cantado posibel. A resulta cu na Aruba ningun instancia tabatin un registracin completo di nos cantadonan di Dande.
Na 2021 un studiante di Universidad di Aruba, Keyla Helder, kende ta studia na e facultad pa Trahado Social, a bin reforsa e team di documentacion aki y a yuda confirma e datonan cu tabatin colecta pa asina traha un Lista Preliminar. E contratiempo mas grandi cu a encontra den e proceso aki ta cu hopi biaha ta haya varios nomber, pero no tin e nomber oficial di e cantado y sin nomber completo ta hopi difícil pa haya nan fecha di nacemento y/of di fayecemento.
Pa medio di e articulo aki FMC ta haci un apelacion un biaha mas na tur hende cu sa nomber completo di un of mas cantado di Dande y por yuda pa haya su fecha di nacemento y eventual fecha di fayecemento, pa tuma contacto cu sr. Nelson Tiel na ANA via tel 583.4880 of na e-mail Cette adresse e-mail est protégée contre les robots spammeurs. Vous devez activer le JavaScript pour la visualiser., cu Keyla Helder na cel 560.8105 of via Cette adresse e-mail est protégée contre les robots spammeurs. Vous devez activer le JavaScript pour la visualiser. of cu Steve Geerman via Whatsapp 565.7409 of na Cette adresse e-mail est protégée contre les robots spammeurs. Vous devez activer le JavaScript pour la visualiser.
Adhunto por mira e Mapa Preliminar di Cantadonan di Dande cu tin e nomber di e cantadonan cu te awor aki por a logra confirma e nomber oficial y e fechanan corecto. Di antemano masha masha danki pa cualkier cooperacion den esaki.
