Ciruhano Dr. Peterson splicando su pashentnan
ORANJESTAD (AAN): Riba Diamars, ciruhano Dr. T.F. Peterson a duna un declaracion dirigi na su pashentnan.
“Mi ta desea di laga tur pashent sa cu mi decision cu mi a haya mi mes ta tuma, no ta di awe pa mañan mi a tume. Mi a haci todo por todo y duna tur locual mi por a duna pa purba di yega na un acuerdo cu AZV pa asina mi por sigui brinda e cuido na boso.”
“Mi deseo tabata pa a sigui duna boso e cuido na hospital di San Nicolas, esta ImSan. Mi tin 61 aña di edad. Mi lo tabata tin 4 of 5 aña mas pa por brinda servicio na mi pashent nan. Hamas mi a pensa cu mi carera na Aruba a caba abrupto manera el a pasa awor.”
Ciruhano Dr. Peterson a sigui bisa: “Mi kier pa boso sa cu mi tabata dispuesto pa entrega un tercera parti di mi presupuesto pa asina duna AZV espacio pa por atrae un ciruhano mas pa hospital di San Nicolas. Hunto cu e budget di e otro ciruhano Arubiano cu nan a core cune, hospital HOH por a haya un ciruhano y e resto, hunto cu e parti di mi budget, hospital di San Nicolas ImSan tambe por a haya un ciruhano. Asina Aruba lo tin 7 ciruhano back.”
El a bisa: “No ta asina cu AZV lo mester a gasta mas placa, al contrario, ta budget nan di fte’s pa e 7 ciruhano nan cu ta existente y supose di ta presupuesta caba nos ta papiando di dje. Pero ta parse cu AZV no ta desea di mira hospital di San Nicolas ImSan desaroya y brinda aun mas mihor cuido di locual nan ta brindando caba. Cuido cu lo bay pa nan mesun aseguradonan.”
“Cu Hospital HOH, despues di un lucha largo y amargo, nos no a logra yega na otro. Nan vision di cuido y seguridad pa cu pashent ta un otro vision cu esun di ami. Esun di ami por ta anticua manera cu HOH ta bisa, pero ami ta kere y para firme pa brinda cuido personal lo mas tanto posibel.”
“E cuido cu mi ta worde paga pe. E cuido di mi pashentnan nunca tabata na peliger manera HOH kier trece padilanti. Y nan sa esey. Ta simplemente cu mi no por identifica mi mes cu e manera cu nan ta desea di duna cuido,” Dr. Peterson a indica.
“Dialuna AZV a haci mi persona un ultimo proposal cu tabata un ofensa no solamente pa ami pero tambe pa Imsan y e balor cu AZV ta duna ImSan como hospital di Aruba y San Nicolas.”
“AZV kier a kita 55% di mi budget pa duna HOH pa nan tuma un ciruhano di exterior den loondienst y duna ImSan 35% di mi budget pa asina ImSan tuma ami den loondienst. (E sobra di mi budget ta worde kita pa via di bezuiniging, locual ta comprendibel y acceptabel).”
Esaki ta un proposicion indecente. Den su palabranan el a bisa: “proposal indecente”.
“Mi tin 27 aña ta traha como un ciruhano vrijgevestigd na Aruba. Como un ciruhano vrijgevestigd AZV no ta accepta mi traha na ImSan. Pero den loondienst y pa menos pago cu un ciruhano di exterior si nan ta accepta. Esaki ta un falta di respect pa ami como un ciruhano cu tin mas aña cu e otro ciruhano nan dunando servicio y cu e praktijk mas grandi na Aruba.”
El a finaliza bisando: “Cu dolor na mi curazon mi ta dispidi di mi pashent nan y desea nan tur cos bon. Mi praktijk ta habri pa si mester busca informacion pa asina por acudi na otro ciruhano. Tambe pa atende pashentnan particulier y of cu otro seguro.”
