ORANJESTAD (AAN): E situacion aki cu a pasa na Cumana, ta uno poco comun pero e ta socede principalmente cu vehiculonan cu tin motor tipo Diesel.
E fenomeno aki ta conoci como ‘Diesel Engine Runaway’, y e ta algo cu ta bin inespera cu abo sinta tras di stuur ta ripara cu e motor ta cuminza draai mas duro cu normal, y ta sigui bira mas duro, y mas duro.
Loke abo tin di haci ta kita bo pia for di e pedal di throttle, pone e speed di auto den neutral, y aplica brake pa bo purba haya control y evita cu bo auto ta sigui bay dilanti fuera di control. Para bo vehiculo na banda, y e ora numa paga e motor.
Pero bo ta ripara cu e motor no ta stop! Pasobra e momento ey ya e motor di Diesel no ta usando combustible mas pa funciona. E ta sigui draai danki na un fuente no-intenciona, esta su mesun azeta di motor. Pesey e Diesel ta cuminza produci huma blanco y diki manera por mira riba e potret aki cu a socede na Cumana.
Ni maske bo habri e hood di Pickup, y desconecta y ranca e bateria for di e vehiculo... e Diesel lo sigui draai keto bay mas duro. E momento ey bo tin di corda cu e motor ya a wordo destrui. Pero pa evita cu e por escala, bo tin di busca forma pa paga e motor.
Con pa haci esaki? E ta simple, bo tin di djis habri e hood, y blokea fisicamente e entrada di aire! Coy cualkier pida paña, of T-shirt mes, y cubri of tapa full e parti unda e motor ta chupando aire. Esaki ta pone e motor keda sin haya aire cu e mester pa sigui produci combustion, y di e forma ey e Diesel Engine Runaway lo stop.
Si acaso bo tin un Fire Extinguisher cu tin CO2 aden, bo tin di spray esaki rumbo pa e lugar unda e motor ta chupando aire. Esaki lo forza CO2 den e cylinder di combustion y lo stop esaki mesora.
Un tip hopi util pa tur hende cu tin motor Diesel den nan vehiculo, sea un sedan, pickup, SUV, of Truck y Tractor.
