Minister Geoffrey Wever:
ORANJESTAD (AAN): “Crea un Fondo di Inversion ta un di prioridadnan pa Gabinete AVP-Futuro y siman pasa e ley a base di cual lo incorpora e Fondo di Inversion a keda cla y a worde entrega na Raad van Advies, cu e meta cu e Fondo di Inversion lo worde trata den Parlamento di Aruba prome cu aña 2025 termina,” ta loke Ministro Geoffrey Wever a declara.
El a sigui bisa: “Mi ta sumamente contento cu un ley asina importante a keda cla y a keda entrega na Raad van Advies. Manera nos gobierno a huramenta nos a cuminsa traha cu Directie Financien y DWJZ riba e ley aki, ya cu e Fondo di Inversion ta importante pa Gabinete AVP-Futuro por cumpli cu su compromiso pa inverti grandemente den infrastructura, revitalisacion di Oranjestad y San Nicolas, renoba nos barionan, inverti den enseñansa, diversifica economia etcetera.”
“Den Gabinete AVP-Futuro su prome presupuesto completo, esta esun di 2026, a aloca caba un prome deposito den e Fondo di Inversion di Afl. 50 miyon y den 2026 pueblo lo por mira e inversionnan cu Gabinete AVP-Futuro lo haci den Aruba. Cu e paso importante aki Gabinete AVP-Futuro ta demonstra cu nos no ta papia so, pero cu nos ta cumpli cu nos compromisonan”, segun Minister di Finansa, Asunto Economico y Sector Primario, Geoffrey Wever.
Articulo 39 di Ley di Comptabilidad ta prescribi cu un “begrotingsfonds” ta worde crea via un ley. Cu un concepto di ley inclui e “memorie van toelichting”, e proceso legal ta inicia pa asina Aruba haya su Fondo di Inversion. E Fondo di Inversion ta un instrumento di maneho di gobierno pa cada aña pone e sumanan publico disponibel y inverti esakinan na beneficio di Aruba su desaroyo.
Como instrumento di maneho e Fondo di Inversion lo facilita inversionnan di gobierno. Gobierno tin dos rol importante den desaroyo di Aruba. Banda di facilita e condicionnan necesario pa stimula inversionannan di sector priva, gobierno tambe tin cu duna contenido concreto na su rol di haci inversionnan. Inversionnan publico ta crea banda di actvidadnan economico ta duna sector priva y inversionistanan internacional e confianza y siguransa necesario pa por sigui inverti den tur sectornan di nos economia. Esaki ta forma parti di e vision y maneho di Gabinete AVP-Futuro pa duna e beneficio di desaroyo economico back na comunidad.
Via e presupuesto aproba pa Parlamento di Aruba, fondonan publico lo worde aloca cada aña den e Fondo di Inversion. Pa 2026 Gabinete AVP- Futuro a aloca 50 miyon Florin den e Fondo di Inversion. Areanan di prioridad ta entre otro inversionnan den embeyecemento di tur districtonan, enseñansa, centro di Oranjestad y San Nicolas y vecindario, casnan social y pa adultonan mayor, transicion di energia y desaroyo di tereno di e ex- refineria. Via e Agenda di Inversion, cada programa di inversion lo worde financia cu fondonan publico disponibel den e Fondo di Inversion.
Den creacion di e fondo lo crea e posibilidad pa incorpora Hulanda den un maneho conhunto di e fondo si logra Hulanda su participacion pa medio di e conversion di e pagonan di e "Covid-lening" den contribucion na e fondo aki.
“Cu huramentacion riba 28 di maart 2025, Gabinete AVP-Futuro den un esfuerso colectivo ta trahando hunto pa ehecuta e Programa di Gobernacion 2025- 2028. Crea e Fondo di Inversion ta prioridad di maneho y ta bira un realidad pa inverti fondonan publico cada aña den desaroyo di nos comunidad,” segun minister Geoffrey Wever.
