Director di DIMP, Luenne Gomes-Pieters:
ORANJESTAD (AAN) – Director di DIMP, Luenne Gomes-Pieters, den entrevista cu DIARIO ta sigui splica tocante e cobranza di BBO na frontera, esta “grens belasting”.
Gomes-Pieters a comenta cu e belasting aki ta wordo paga den dos pida y no ta acumulativo. El a bisa cu tin informacion eroneo cu ta den facebook, cu e ta un extra-schakel, pasobra bo ta paga 7% na frontera, despues ta bolbe bira 7% riba dje, pues bo ta papia di 14% y tin hende ta papia di 15%, 7.5%, pues semper ta keda e discusion si ta 7 of 7.5%.
E dama a reitera cu e no ta un sistema acumulativo pero uno cu ta traha casi mescos cu VTW. Kiermen loke e persona ta paga na frontera e ta trek af bek na momento di su volumen di benta.
No ta asina tampoco cu e producto ey bo tin cu bende pa trek’e af. DIMP a tende hopi hende bisa, por ehemplo, cu si e trece un cargamento specifico di bril y bende nan e mag trek af e belasting na frontera cu el a paga na dje. “E no ta asina; si mi bende tur tipo di bril of tur tipo di producto cu mi tin den mi negoshi, mi tin mag di trek af loke mi a paga na frontera”, director di DIMP ta reitera.
El a indica cu e ta un sistema cu ta conoci caba na Curacao (OB) y mescos ta bay conta pa Aruba. Loke si ta bay sosode ta cu Aduana lo mester haci controlnan un tiki mas severo na esnan cu no ta declara e productonan pa bende cu nan a hinca den maleta, pasobra solamente control di Aduana por frena e cosnan aki.
Luenne Gomes-Pieters a remarca cu e ley aki ta mara na e presupuesto 2023, y ta pone cu entrante 1 di Juni e ley lo mester drenta na vigor. El a expresa cu e tempo ta hopi cortico pasobra e aña ta pasando asina lihe, pero DIMP tin entendi cu e ley tin dos siman caba na Raad van Advies pa duna su conseho riba esaki. “Pero na spera di conseho di Rad van Advies nos ta haya importante pa brinda informacion”, director di DIMP a enfatiza.
