Lanzando ‘The School Tour’ pa October
ORANJESTAD (AAN): Despues di 10 aña, artista Curaçoleño Levi Silvanie ta bolbe cu un album y un mision nobo: “usa mi musica y storia pa empodera otronan cu ta sufri den silencio”. Diabierna 14 di April venidero, Silvanie lo duna un presentashon na Cas di Cultura (CdC). Na Oktober e aña aki e lo lanza un proyecto pa concientisashon di salud mental, cu enfoke riba hobennan di scol secundario na Aruba, Bonaire y Curaçao.
Un den cada cuatro persona ta experiencia problema cu salud mental of un enfermedad mental. Mitar di tur caso ta cuminsa na of prome cu edad di 14 aña, y suicidio pa motibo di depresion ta e di 4 causa di morto mas comun den esnan entre 15 cu 29 aña di edad. Den nos comunidad, problema cu salud mental masha poco ta worde reconocí of papia, y hopi bes ta worde mira manera un berguensa. Esaki por descurasha hende di papia tocante nan salud mental of busca ayudo.
E ta wordo skirbi como: gs’me:miss y e ta Silvanie su prome album den diez aña. Un obra fragil di 13 cancion den cual e ta habri su mes tocante su bida, su lucha, y crecemento. E album ta pinta un imagen conmovedor di e evolushon di Levi Silvanie for di ‘djis mi mes’ pa ’gs’me:miss’; for di su subida pa fama y su bataya cu salud mental, te na descubrí con pa keda fiel na su mes. Inspira pa e batayanan personal aki, Levi a cuminsa un movimento dos aña pasa cu e focus riba salud mental pa hoben y adulto. Usando gs’me:miss como herment, el a desaroya un programa exitoso pa trece empoderamento musical na scolnan, companianan y casnan.
Diabierna 14 di April di 7'or pa 9'or di anochi, Levi Silvanie lo duna un presentashon musical na CdC. Tin cupo pa no mas cu 100 persona. Pa cumpra karchi por tuma contact cu Cas di Cultura.
'The School Tour' ta bin bek: Despues di un pilot exitoso na April di 2022, The School Tour lo bolbe back e islanan ABC den e aña escolar 2023-2024. E tour aki tabata inicialmente planea pa tuma lugar e luna aki, pero pa motibo di un cantidad grandi di aplicashon di scolnan y studiantenan y e consecuencianan logístico, esaki a worde posponi pa Oktober 2023. Cu e School Tour y su album nobo, Silvanie kier usa e poder di musica pa inicia conbersashon habri tocante salud mental y cuido personal. Un experiencia inmersivo den cual e ta compartí su musica y su storia, incluyendo dialogo abierto cu profesionalnan di cuido (mental) local. Papiando di obstaculonan diario y e diferente maneranan cu por mehora of mantene un estado mental saludabel.
Danki na e apoyo di Minister di Educashon y Deporte di Aruba, Universidad di Aruba/Shoco Wellness, Medwork, y otro partidonan, The School Tour lo bini Aruba pronto. Banda di e sessionnan pa scolnan, lo tin session pa mayor y pa hende homber tambe. Cada session di The School Tour lo incluí un Health Pavillion, den colaborashon cu profesionalnan local. E Health Pavillion lo tin un variedad di profesional di salud y bienestar unda bo por haya asistencia di biaha y ricibi informashon. Ora ta trata cuido di salud, semper tin espacio pa mehora. Pa es motibo lo tin un ‘open panel discussion’ tambe pa papia tocante e retonan actual na Aruba y posibel solushonnan.
Participashon na tur e eventonan di The School Tour lo ta completamente gratis, pero registrashon ta necesario. Tur scol secundario na Aruba por registra prome cu dia 1 di Mei 2023, via e website levisilvanie.com/schooltour y e meta ta pa yega na mas hopi studiante posibel.
