Entrevista cu Ombudsman:
*Aruba a dal un paso importante pa transparencia y defensa di derecho di ciudadano
ORANJESTAD (AAN): Pa e prome biaha den historia di Aruba, un hende muhe ta dirigi e oficina di Ombudsman, cual tambe ta un instituto nobo pa Aruba. Ombudsman Bureau ta un institucion clave pa defende derecho di ciudadanonan.
Na un momento caminda transparencia, rendicion di cuenta y confiansa den institucionnan ta mas necesario cu nunca, DIARIO a sinta combersa cu Ombudsvrouw (Ombudsman) pa compronde no solamente e significado di su nombramento, sino tambe e impacto y e desaroyo di e rol cu e tin.
Kico exactamente ta e trabou di un ombudsman? Con ta proteha un ciudadano ora e ta sinti cu e sistema a faya? Esey ta algun di e preguntanan cu ta explora den e entrevista aki, cu ta parti di un serie di articulonan cu lo wordo publica.
For di su huramentacion dia 1 di october 2024, Sra. Bryson a tuma e liderazgo pa traha riba un oficina independiente pa defende derecho di ciudadano y promove bon gobernacion. Cu un trayectoria solido den Derecho y un gran compromiso cu comunidad, Sra. Bryson ta pone e base pa un institucion cu lo sirbi como un pilar den defensa di pueblo Arubiano.
Actualmente, Bureau Ombudsman ta den un fase di preparacion intensivo, cu plan pa habri na mitar di 2025. Sra. Bryson a enfatisa e importancia pa tene tur proceso y servicio cla, pa por duna e nivel di calidad cu pueblo merece.
Bryson a duna di conoce cu e ta hayando hopi felicitacion den comunidad pa cu e funcion aki, pero den su concepto e pabien ta pa pueblo di Aruba cu e instancia aki a bira un realidad.
Ombudsman Bureau ta un instancia cu ta hopi importante pa pueblo di Aruba banda di e instancianan tradicional manera Corte di Husticia of otro instancianan administrativo caminda por entrega keho tambe.
El a bisa cu dentro di poco por entrega keho na Ombudsman Bureau pa un conflicto, inkietud of algo cu segun un ciudadano no ta bayendo den forma corecto.
Sra. Bryson a conta cu loke a motib'e pa solicita pa e funcion aki ta na prome luga e amor pa Aruba y pa trece cambio como tambe hiba Aruba den un direccion positivo, el a bisa.
Na momento cu e vacatura a sali el a pensa cu su experticio legal y e amor cu e tin pa comunidad, por bay combina un tiki di tur dos area treciendo un cambio de forma positivo den e funcion aki.
E funcion di defensor di pueblo ta uno hopi reconoci por ehempel na Latino America. El a indica cu hunto cu su coleganan di Reino ta haciendo tur esfuerso pa asina tin mas colaboracion, no solamente den Reino, pero tambe den region pa asina hunto por haci cambionan grandi pa e paisnan, pero tambe como defensornan di pueblo hunto, Sra. Bryson a expresa.
Den un otro articulo DIARIO lo trece mas di e entrevista interesante aki cu Sra. Juraima Bryson den su funcion di Defensor di Pueblo.
