Presidente di Parlamento Marlon Sneek:
ORANJESTAD (AAN) – Presidente di Parlamento di Aruba, Marlon Sneek, den entrevista cu Matutino DIARIO, a menciona cu si kizas, e Islanan BES por tin un pensamento manera bay direccion di Status Aparte, mescos cu Aruba, Curacao y Sint Maarten, mester wak si nan economia lo por carga esey. El a bisa esaki a base di un pregunta di DIARIO.
“Door cu nan ta cay bao di Hulanda, full loke ta presupuesto, papiando hipoteticamente, si nan mester di binti florin pa aña pa por draai e pais, pero nan ta produci cinco, Hulanda ta pone 15. Esey ta keda un reto, cuanto bo ta produci, cu si enberdad lo bo por para riba bo mesun pia”, Presidente di Parlamento a comenta.
En todo caso, Sneek a reitera cu e preocupacion cu e Islanan BES, Bonaire, Saba y Statius tin na e momentonan aki tocante posibel cambionan den dos leynan WolBES y FinBES, lo wordo trata den reunion tripartite prome cu IPKO door cu e delegacion a bisihita e tres Parlamentonan, cuminzando na Aruba, sigui pa Curacao y despues Sint Maarten, y a referi Parlamento di Aruba como esun cu lo bay papia di loke nan a trece dilanti, con nan lo por resolve.
“Si nos ta bisa ‘ban pon’e riba agenda, si no logra riba agenda toch nos ta traha un ‘paper’, corda cu no solamente e parti di e reunion ta importante, pero tambe e lobimento, e momento cu bo ta sinta na mesa come cu otro, bebe un coffie, bo por trece bo preocupacionnan. No tur ora tur partido ta para mesun caminda, por ta bo ta haya un par cu ta bisa cu loke ta pasando ta bon, of bo ta haya un par cu ta bisa no, e cos aki ta inaceptable. Y nan por hunga nan rol, mirando cu nan tin contacto. No lubida cu e Parlamento di Hulanda ta consisti di 150 Parlamentario y ora cu nos ta bay IPKO, nos ta bay cu e Comision cu ta atende cu koninklijke aangelegenheden, dus nos ta sinta cu un grupo cu ta parti di e 150nan ey. Kiermen, semper den e combersacionnan ey, bo por haya hendenan cu por adopta bo, haya cu e punto cu bo ta trece dilanti mester atencion, y nan mes lo haci e lobimento cerca otro coleganan pa haya sosten pa tene cuenta cu cierto casonan of otro direccion”, Presidente di Parlamento a expone.
