Ingeniero cu ta investigando lo duna presentacion
ORANJESTAD (AAN): E organizacion KIVI Kring Caribbean ta cla pa duna nan di dos actividad di 2022, cu lo ta un presentacion di ingeniero ir. Diego Acevedo cu ta investigando e posibilidad pa recupera elementonan kimico scars den awa descarga durante produccion di awa dushi pa medio di membrananan manera na WEB Aruba NV.
E presentacion aki lo tin e tema: “Investigacion di SISSTEM pa balora e awa salo di e proceso di Reverse Osmosis”.
Universidad di Aruba den colaboracion cu KU Leuven (Universidad Catolico di Leuven - Belgica) ta anfitrion di e programa di SISSTEM. SISSTEM ta para pa “Sustainable Island Solutions through Science, Technology, Engineering and Mathematics” cu ta worde financia door di Comunidad Europeo.
Entre otro SISSTEM ta encera un posibilidad pa cu 11 proyecto pa haci investigacion cientifico ariba e tereno di desaroyo sustenible pa cu estadonan insular chikito manera Aruba. A base di e investigacion cientificonan aki e investigado por haya su grado di doctor (PhD).
Un di e candidatonan ta Ir. Diego Acevedo cu tin un grado di Bachelor of Science den ingenieria mechanico (magna cum laude) di Universidad di Florida na USA y un grado di Master of Science den tecnologia di energia sostenibel di Universidad Tecnico di Delft na Hulanda.
Diego a traha antes ariba e tereno di tecnologia inovativo pa desaroya energia maritimo, red di refigeracion di distrito, produccion di awa potable y produccion ariba lama di energia solar.
Contenido di su presentacion: Riba e isla aki, e compania WEB Aruba NV ta usa e tecnologia di “reverse osmosis” cu membraan pa traha awa potable sacando e salo for di awa di lama. E descargo di e tecnologia aki ta un awa masha concentra di salo cu ta worde yama “brine”. Awor aki esaki ta worde descarga den laman pero figura bo si e brine aki worde considera como un fuente di mineralnan cu por worde recupera?
Esaki exactamente ta loke e investigacion di Diego Acevedo ta encera. Pasobra den e brine aki tin substancianan cu ta scars na mundo pero cu por worde recupera economicamente. Por pensa ariba e substancianan manera Magnesium y Lithium cu tin un mercado internacional pa nan. Esun especial cu tin hopi pregunta pe y cu ta scars awor ta Lithium cu ta worde uza den baterianan pa carga y warda electricidad sustenible pa auto, cas etc.
Tambe por pensa ariba Chloor cu por worde produci di salo, cu kimicamente ta worde yama Natriumchloride. Mundialmente tin diferente gruponan scientifico cu ta haciendo e mesun investigacion aki. Asina ta tin un competencia andando pero tur ta yuda otro si. Y Diego Acevedo ta den e red cientifico aki conhunto cu esnan den e teranan di Comunidad Europeo rond di e lama Mediteraneo.
KIVI KRING Caribbean ta invita tur ingeniero pa asisti na e presentacion aki pa engrandece e sabiduria cu un tema innovativo aki cu ta pone e ingeniero waak “out of the box”. E actividad lo tuma luga dia 31 di maart 2022 den Aula di Universidad di Aruba di 6:30 te cu 7:30 p.m. sigui pa un encuentro di 7:30 te cu 8:30 pa siña conoce otro of discuti mientras gozando di un drink y snack. Bo tin di registra na:
Pa cubri e gastonan, lo cobra un suma pa participante.
