Sylvio Werleman, Hefe Afdeling:
ORANJESTAD (AAN) -- Den e contexto di observa e Luna di Seguridad y Salud na pia di trabao, señor Sylvio Werleman Hefe di e Afdeling di Inspeccion Di Seguridad na DTI, a elabora den entrevista cu DIARIO, kico ta e rol di su departamento.
El a bisa cu e departamento aki ta keur tur lugar cu tin gas comercial, manera restaurant, hotelnan, entre otro; nan ta haci inspeccion prome cu e establecimento haya permiso y un certificado di seguridad, cu tin un validez di cinco aña.
Kiermen, cada cinco aña nan ta haci control tocante ki ora nan vigencia ta expira, pa laga un recordatorio cu e aña aki ta nan turno pa keur nan instalacion. Si nos laga carta atras y no ta duna reaccion, DTI lo haci otro inspeccion y ta laga un carta di e Hefe suplente, pa nan wak cu e ta un asunto serio.
Si nan no cumpli cu esey, nan ta laga e compania cu ta distribui e producto pa cera e suministro di gas, pa nan no haci uso di dje, te ora nan busca un instalado pa haci e instalacion di gas.
Werleman a bisa cu su departamento tin un lista cu nuebe establecimento cu ta registra na Inspeccion di DTI, cu tin nan vergunning pa haci nan trabao.
Werleman a señala cu Ley ta prescribi cu e persona cu ta haci e instalacion ta esun cu ta keur hunto cu DTI. El a agrega cu nan tin hopi atencion riba instalacion, y nan ta controle hopi bon, buta presion pa wak si no tin un liek, prome cu nan bisa cu ta goed gekeurd.
Ademas, el a splica cu ora un negoshi nobo habri, nan no tin mucho informacion, pero DTI ta porta habri pa duna informacion tocante kico nan mester cana y ta duna nan e lista.
E proceso di Keuring, Werleman ta splica, mester cuminza for di momento cu Inspeccion haya e pakete for di e instalado pa asina nan traha e parti administrativo, pa keda cla y por cobra pa e trabao, y despues ta haci un cita. Ora DTI ta presenta nan ta haci e keuring pa despues traha atrobe e proceso administrativo, pa otorga e vergunning y certificado di seguridad na e doño di e negoshi.
