Jonathan Ramada di Sindicato SINBA:
ORANJESAD (AAN): Rijkswet HOFA ta un topico fuerte den e ultimo lunanan. Partidonan politico, gremio y ciudadanonan di Aruba, no tin mucho claridad riba e contenido y loke cu un rijkswet lo nifica pa Aruba. Fraccion di MEP den Parlamento, ta mustra responsabilidad y ta comparti informacionnan pa asina tur hende por ta na haltura di tur loke tin rond di e rijkswet. Diabierna ultimo, nan e tene nan di dos encuentro cu Gremionan Sindical y Comercial. E encuentro a wordo bon atendi y varios sindicalista a duna nan opinion di e rijkswet y e decision di Gobierno como tambe di e falta di informacion cu ta existi.
Den un entrevista saca for di pagina di Facebook di Fraccion di MEP, e representante di sindicato SINBA, señor Jonathan Ramada, a expresa cu e ta un bon iniciativa di Fraccion di MEP pa trece informacionnan di nan banda tocante rijkswet. Pero, el a bisa tambe cu ta bon pa Gobierno di Aruba tambe trece di su banda e motibo pa cua mester bin un rijkswet si Aruba ta den cumplimento.
Señor Ramada a expresa su opinion y a remarca cu Aruba mester por kere cu nos por haci cosnan nos mes. Segun Ramada, lo por tin algo scondi den e rijkswet cu como sindicato, no ta wak y no ta comprende e intencion di e rijkswet. “Mi ta haya straño cu aunke cu Aruba ya ta cumpli, Hulanda kier impone un rijkswet. Esaki ta mi preocupacion personal”, señor Ramada a remarca.
Sindicato SIMBA ta kere cu semper mester tin oportunidad pa sigui negocia riba e rijkswet. Y semper e mester ta un consensus manera e ta ser yama. “Consensus mester ta bon pa bo y pa mi. Hunto nos mester bin na acuerdo riba dje pa e por bay. Mi no sa si pueblo ta parti di e consensus aki, cu ta mi pensamento personal”, señor Ramada di SINBA a expresa.
