PHILIPSBURG: E hecho cu hopi persona condena na St. Maarten, ta wardando espacio pa por bay sinta nan castigo, debi cu tin scarcedad enorme den prison na e isla,
a pone partido D66 di Hulanda bira hopi preocupa den Tweede Kamer. Pesey awor e partido a cuminza exigi claridad for di Gobierno.
E parlamentarionan Joost Sneller, Hanneke van der Werf, y Jorien Wuite a manda preguntanan por escrito e siman aki pa Secretaria Alexandra van Huffelen riba e scarcedad di espacio pa detene hende na St. Maarten.
E corant The Daily Herald dos luna pasa a divulga cu na e isla tin por lo menos 136 persona cu ta wardando espacio pa bay sinta nan castigo. Esaki ta loke a hala atencion di e politiconan na Hulanda.
Awor nan kier sa tambe riba construccion di un prison nobo na St. Maarten haci via United Nations Office for Project Services (UNOPS). Nan kier sa con leu esaki ta awor, y ki tempo e lo keda cla. Tambe nan kier sa di Secretaria van Huffelen, ta con serio e scarcedad di capacidad ta na e prison.
