Caso insolito na Curaçao
WILLEMSTAD: Un situacion hopi dificil a presenta su mes den oranan di Diabierna mainta na e isla di Curaçao. Un homber cu ta den proceso di divorcio, ta pasando den asina hopi situacion y yegando den caminda sin salida, cu el a dicidi na bay comete lo extremo.
El a dicidi pa usa un Heavy Equipment conoci como ‘Excavator’ di marca Hitachi color oranje, pa core cu esaki bay te na e cas den bario di Mahuma, pa asina cuminza basha e cas abao.
No ta conoci kico a drenta den mente. E lo ta pensando cu awor di divorcio ta bin, cu ni e, y tampoco su futuro ex-pareha lo no keda cu cas pa biba aden.
Otro fuentenan a splica cu e homber a djis bay basha mitar di e cas abao (su mitar), y laga e otro mitar di e muher so keda. Pero durante e bashamento abao, el a dicidi dado momento pa basha esaki completamente abao! El a hasta sigui despues pa basha cura di cas, y porta di garage abao.
Unidad di polis a bay eynan, y a topa cu e homber. Polis a nota cu e cas ta wordo destrui, mientras cu keto bay tin artefactonan electrico, cashi, mesa, stul, cortina, y tur cos aden. Pues no a haci e cas bashi.
Polis a bin compronde cu e cas ta pertenece na e pareha, y ta den proceso pa separa y divorcia. Esaki ta algo cu ta haci e homber dolor pa basta tempo, y el a dicidi riba su mes pa basha e cas abao, sin worry cu nada. El a admiti na Polis cu e tabata hopi emocional ora cu el a start e ‘Excavator’ e mainta ey, como cu e asunto di divorcio aki ta tumando demasiado tempo.
Polis a ordena e homber pa e paga e Excavator, y despues a detene. E homber di inicial C.M.S. di 45 aña ta naci na Curaçao, y a wordo hiba Warda di Polis unda cu Fiscal Auxiliar a duna ordo pa e keda deteni.
Por djis imagina awor tur e acusacionnan cu lo bin awor riba schouder di e homber aki, sin papia mes di e casonan civil contra dje.
