Pa: B. Bergen -- Parti 1
Segun historia, prome cu aña 1920 tabata tin un docter mericano dr. Hopkins, cu a haya cu e situacion di servicio medico na Aruba tabata hopi malo y a pidi Rockenfeller Foundation pa un yudanza financiero pa Aruba. Nan kier a yuda Aruba, pero Gouverneur Neuijens no kier a acepta e ayudo y a bisa Mgr. Vuylsteke cu si Vicariaat no por haci nada, anto tin cu bin cu un hospitaal neutral. Manera ta conoci Aruba su prome hospital a wordo realisa door di iniciativo di Gezaghebber Ferguson, esta prome cu aña 1920.
Medida di e hospital tabata 9 x 3.6 m. E di dos hospitaal, tabata den un cas moda bieu di famia Guillermito Oduber, banda di Kerki Protestant na Wilhelminplein na Playa. Dr. Horacio Oduber tabata e tempo ey e prome Docter di Aruba. Di tres hospitaal tabata den un cas cu tabata un school di meester Kuiperi, un cas di famia Notaris Kwartsz den caya John Gerard Emanstraat den huki di Miraflorweg den vecindario di Watertoren na Playa.
Ariba iniciativo di Obispo Vuylsteke, e tereno di Landhuis di Plantage Sividivi a wordo cumpra y na prome instancia e tereno y e edificionan ariba e tereno a wordo usa door di e soeurnan Dominicanessen. E soeurnan tabata biba den e cas cu tabata cas di e directeur di Goudmaatschappij, y nan a cuminza un hospitaal cu cuater camber pa patient. Na cuminzamento nan tabata traha cu locual nan tabata tin y poco poco na a haci mas espacio pa patient.
Hospitaal San Pedro di Verano, tabata e prome berdadero hospitaal cu a habri su porta na aña 1920.
Despues di e cuater cambernan, hospitaal a sigui e siguiente aña cu mas edificio, entre otro lugarnan pa hende muher y hende homber, dos camber pa haci operacion, dos camber pa parto, cushina, wasserij, mas despues un lugar pa saca potret (Rontgen therapie), un lugar pa mucha y pa anciano y tambe un mortuarium, un kapel y un lugar pa pacientnan cu problema mental etc. Na aña 1953 hospitaal tabata tin 135 cama pa pacient y na aña 1969 mas cu 180 cama.
Na aña, 1929, docter Adriaan Dussenbroek, como docter di Ahrend Petroleum Maatschappij, a laga traha un hospitaal chiquito patras di su cas na Quinta del Carmen na Bubali.
Na aña 1929, Lago Oil & Transport Co. tambe a traha un hospitaal na San Nicolaas, ariba nan tereno pa su trahadornan y nan famia.
Na aña 1959 e Soeurnan Franciscanessen a reemplaza e souernan Dominicanessen. Na aña 1960, Minister di departamento di salud Sr. I.C. Debrot a laga hospitaal sa, cu hospitaal a wordo reconoce, pa educa y duna diploma, na e verpleegsternan cu a tuma e curso di ziekenverpleging, diploma A y tambe a wordo reconoce e kramaantekening ariba e diploma A. E prome docentenan tabata dos soeur Fransiscanessen y un praktijk docente Arubiano.
Manera ta conoci, despues cu Lago na aña 1961 a anuncia cu den futuro nan ta bay sera nan hospitaal, pasobra mas cu mitar no ta den uzo mas y asina no bale la pena pa tene nan hospitaal habri pasobra e ta costa man yen di placa.
San Pedro Hospitaal ora nan cera e hospitaal tabata tin cu tuma pacientnan di Lago over. Nan no por a haci nada otro, nan a wordo obliga di busca moda pa soluciona e problema, pa tuma e pacientnan di Lago ora hospitaal di Lago a cera.
Hospitaal San Pedro tabata tin na e momento ey 200 cama, dos sala di operacion, dos sala di parto. Pa haya mas posibilidad pa tuma e pacientnan di Lago, Lago mester a traha lugar ariba e tereno di hospitaal, esta traha edificionan pa amplia e posibilidad pa tuma e pacientnan di Lago.
