Rapportnan Contraloria General a pidi Parlamento haci su trabou --- *Un Ombudsman ta cera porta pa base di corupcion y favoritismo --- *Ley di Contabilidad y Derecho di Budget den practica sin balor
ORANJESTAD (AAN) — Representacion di Parlamento ta un foro pa partidonan politico cu haya voto durante eleccion por haci propaganda gratis pa nan partido? Esaki ta e pregunta cu ta surgi ora analisa e produccion den Parlamento, cu ta un gasto grandi pa Aruba.
Pa cuminsa, ta dificil pa establece e cantidad di hora cu un Miembro di Parlamento realmente ta traha pa profundisa su mes den e materia cu Parlamento ta atende.
Ta hustamente e hecho cu Parlamento no ta cumpli cu su trabou debidamente, a haci cu Aruba ta haya su mes den problema financiero serio, manera ta bini dilanti den relato oficial di e controlador oficial di Gobierno y Parlamento cu ta Algemene Rekenkamer Aruba.
Fayonan di Parlamento cu a deshaci di e deber di control financiero riba gobernacion di Mike Eman riba uzo di 1.6 Biyon, a haci cu mester a subi e peso di belasting pa Pueblo cu un belasting nobo.
Fayonan di Parlamento pa controla maneho financiero di Gobierno Mike Eman, a permiti e creacion di e debe nacional, a hinca Aruba den e situacion actual.
Continuamente, a base di rapportnan oficial, DIARIO ta pidi pa reforsa e sistemanan di e pais pa actua contra mal gobernacion, cu a pusha Aruba den e poz financiero for di cual supervision di Hulanda mester a saca Aruba.
Autonomia di Aruba a wordo kibra dor di e maneho di Mike Eman di crea un debe nacional y debe di PPS pa paga despues y esaki a habri porta pa Hulanda awe pone presion pa baha salarionan di personal di Gobierno pa baha gasto di Gobierno.
Pa soluciona e causa di e caida financiero di Aruba, no solamente mester tuma medida pa mantene e caha di placa di Aruba den balansa, pero manera semper DIARIO a trece dilanti mester introduci ley mas pisa pa actua contra gobernantenan cu crea caos financiero pa Aruba dor di hiba un maneho descontrola y desastroso cu ta bay contra Ley di Contabilidad.
Na mes momento mester pone fin na e portanan habri pa corupcion y duna Pueblo mas arma pa evita e abuso aki.
Siman pasa e temanan aki a wordo trata den Parlamento, cu atrobe a presenta su mes como un futuro di partido politico cu kier haya voto den proximo eleccion.
DIARIO a base di loke nos a aboga for di 2018 ora medidanan pisa mester a evita estado di bancarota di Aruba, mester sostene e exigencia pa uza responsabel di placa di Pueblo wordo hancra den Constitucion, cu ta regla e estado di derecho di Aruba.
Di e forma aki e partido of gobernante cu hiba un maneho desastroso pa Aruba, por wordo persigui pasobra el a bay contra Constitucion.
Mester fortalece e control cu Parlamento por hiba na nomber di Pueblo riba e forma cu Gobierno ta gasta placa. Algemene Rekenkamer Aruba ta encarga cu e tarea aki y ta cumpli cu su trabou manera e rapport Bo Aruba ta mustra.
Pero Algemene Rekenkamer Aruba, Raad van Advies di Aruba no tin nada di bisa realmente manera a keda proba cu baha BBO na mita, introduci proyectonan PPS sin control y hasta trece Citgo cu un acuerdo cu a keda fantasma.
Corupcion ta un problema na Aruba y na hopi pais, caminda un Ministro por dicidi kende ta haya tereno entre otro y kende no ta haya.
Ora e hende cu a wordo perhudica of no ta haya oido di un gobernante tin un Ombudsman, e tin caminda pa cana y entrega reclamo cu mester wordo investiga dor di e Ombudsman.
Pa por a trece cambio di siman pasa, tabata tin mester di dos tercera parti di sosten di Paramento. Pues oposicion tambe mester a yuda pasa e proyectonan di ley, loke no tabata e caso den otro reunion di Parlamento cu ta crea e pregunta si Parlamento ta representacion di Pueblo na fabor di bienestar di Pueblo of un foro pa busca voto cu placa cu un Pueblo den problema financiero, mester paga.
