Parlamentario Evelyn Wever-Croes:
ORANJESTAD (AAN): Den conferencia di prensa di Fraccion di MEP dialuna ultimo, Parlamentario Evelyn Wever-Croes a expresa palabranan di forsa na famianan di hobennan cu a perde nan bida door di violencia arma. E aña aki, dos hoben a ser asesina. E prome tawata un hoben di 18 aña y siman pasa un hoben di 16 aña a wordo ranca di su bida.
Esaki, Parlamentario Croes a expresa, ta conduci na e pregunta: unda nos ta bayendo como pais? Kico ta locual ta sosodiendo cu e fundeshi di nos pais, cu nos hobennan ta haya nan den riesgo, den peliger asina te cu nan ta perde nan bida asina?
“Mi ta kere ta momento pa nos tur reflexiona y mira kico cada un di nos por haci pa fortifica e fundeshi aki. Pa proteha nos hobennan y brinda nan mas oportunidad den bida. Mi a haci un apelacion na gobierno tambe pa nos bay mira kico ta locual nos tin cu bay haci pa sostenene e famianan, pa sostene nos hobennan.
Mi ta urgi Minister President di pais Aruba, cu despues di e dia nacional di limpiesa, mi ta pa e hinca e mesun entusiasmo, e mesun energia, mesun dedicacion cu el a hinca den limpiesa di nos pais, pa aworaki nos hiba e debate real cu nos mester hiba na Aruba. Kico ta pasando, kico nos mester haci, pa nos por proteha nos hobennan, pa nos por fortifica e fundeshi di nos famianan na Aruba.
Cada hoben cu fayece na un forma asina ta un dolor profundo den nos curason, y hamas nos mester normalisa na Aruba cu hendenan ta wordo asesina y sigur no hobennan. Di akinan un biaha mas, mi ta desea famianan hopi forsa pa atende cu e dolor inmenso aki y mi ta spera nos por logra yega na un forma pa trece paz y trankilidad den nos comunidad”, Parlamentario Wever-Croes a expresa.
