Casi un Siglo despues di Guera di Horor y entrada Era Nuclear --- * Prome Guera Mundial antesala di Segundo Guera Mundial --- *Hitler y Mussolini, Fayo Liga di Nacionnan y Great Depression
ORANJESTAD (AAN) — Mientras problemanan serio ta azota mundo na e momentonan aki, hopi hende ta puntra nan mes kico e resultado di tanto turbulencia politico ta nifica.
Pa hopi hende e situacion mundial actual ta algo cu nunca mundo a conoce, en todo caso no un situacion den cual tur e elementonan a uni.
Ora mira atras den historia ta mira con un Siglo pasa, mundo realmente a conoce base di e problemanan cu nos conoce awe.
E pregunta cu nos ta haci nos mes na e momentonan aki ta, si e situacion actual lo termina den e situacion cu final di e Prome Guera Mundial na Siglo 2020 a conoce of si e lo termina cu otro Epoca di Oro manera tabata e caso cu Segunda Guera Mundial, cu a habri epoca di properidad y abundancia pero na mes momento a percura pa e problemanan di awe.
Si resumi e prome decadanan di Siglo 20 ta topa cu un mundo cu a conoce un Guera Mundial, a conoce un epidemia mundial cu a haci hende bisti tapaboca manera awor ta e caso na un mundo cu a conoce e Great Depression.
Mundo a sobrebibi e union di e tercer factornan aki cu sinembargo a causa un guera nobo, cu ta e Segundo Guera Mundial.
E final di Prome Guera mundial a laga un sabor amargo atras na paisnan Europeo caminda e poblacion no por a bay di acuerdo cu e condicionnan cu a wordo impone dor di e Tratado di Versailles.
Na e momento otro elementonan, cu awor aki tambe ta laga hende cu pregunta grandi, a conta.
Uno di nan ta e realidad cu Nacionnan Uni no por pone un fin na e situacion mescos cu e tempo e Liga di Nacionnan tambe a bira un fayo grandi.
E great depression a laga su marca atras despues di guera. Un sentimento di resentimento tabata presente despues di Prome Guera Mundial, cu tabata haci cu hende tabata mira futuro sin speransa.
Ta esaki a habri caminda pa Mussolini y Hitler na Europa mientras cu den Oceano Pacifico, Hapon tambe a mustra su cara.
Hitler y Mussolini tabata sa con pa manipula e pueblonan cu a kere den nan palabra di creacion di paisnan poderoso nobo.
Awe ora nos contempla mundo nos ta mira hamber creciente, manera tabata e caso tempo di e Great Depression pero tambe como resultadonan na paisnan Europeo cu mester a paga sumanan enorme despues di Prome Guera Mundial.
Un mundo cu ta parce sin futuro ta e realidad di awe cu nos conoce tambe un guera na Ukraine cu ta hinca mundo den mas suspenso mientras paisnan ta cera unionnan pa asina haya por ehempel petroleo.
Kico ta spera mundo den cuadro di e Guera di Ukraine den cual, si kier acepta of no, henter mundo indirectamente y cantidad di pais (incluso Hulanda) directamente ta envolvi?
E lo termina den un tempo cu placa lo lora pa asina crea un epoca di oro cu tur e personanan cu awor cu tin tanto problema financiero, ta inverti den edificionan y propiedadnan mas facil pa cumpra?
Un epoca di oro ta forma su mes manera despues di Segundo Guera Mundial of nos mester spera un confrontacion mundial?
Manera ya bisa, e confrontacion ya ta mundial y hasta presente den nos region.
Capitalnan enorme ta wordo hinca den industria di arma y tur deposito di arma porfin ta haya salida di benta.
Un motibo mas pues pa puntra nos mes, cual lo ta e cara berdadero di 2023 despues cu na 2022 hasta e menasa di bom atomico a presenta!
